हाल अस्पतालले जनरल फिजिसियन, स्त्री तथा प्रसुती सेवा, जनरल तथा ल्याप्रोस्कोपिक सर्जरी, न्यूरो सर्जरी, मानसिक तथा नशा रोग, छाला तथा सौन्दर्य, नाक–कान–घाँटी, बालरोग, युरोलोजी, हेमाटोलोजी, हाडजोर्नी तथा ट्रमा लगायतका सेवा उपलब्ध गराउँदै आएको छ। साथै, अत्याधुनिक ल्याब, सिटी स्क्यान, फोरडी भिडियो एक्सरे, मोडुलर अपरेशन थिएटर, २४ घण्टा इमर्जेन्सी, आइसीयु, एनआइसीयु, क्रिटिकल केयर लगायतका सेवा सञ्चालनमा रहेका छन्।
अस्पतालले सामाजिक सेवा एकाइमार्फत विभिन्न सामाजिक संघ–संस्थासँग सहकार्य गर्दै चितवन तथा आसपासका क्षेत्रमा स्वास्थ्य सेवा प्रदान गर्दै आएको जनाएको छ।
वार्षिकोत्सवको अवसरमा बृहत् रक्तदान कार्यक्रम पनि आयोजना गरिएको थियो। कार्यक्रममा क्षेत्रीय रक्तसञ्चार सेवा चितवनको प्राविधिक सहयोग तथा ब्लड डोनर्स एसोसिएसन चितवनको सहकार्य रहेको थियो।
कार्यक्रममा सामाजिक सेवा तथा सूचना अधिकारी केदार प्रसाद सुबेदीले स्वागत मन्तव्य व्यक्त गर्दै रक्तदाताहरूका अनुभव प्रस्तुत गरेका थिए। कार्यक्रममा अध्यक्षता चेतनाथ वाग्लेले गर्नुभएको थियो भने श्याउली बजार टोल विकास संस्थाका अध्यक्ष बद्री पौडेल, ब्लड डोनर्स एसोसिएसनका केन्द्रीय अध्यक्ष अर्जुन अधिकारी लगायतको उपस्थिति रहेको थियो।
कार्यक्रममा वरिष्ठ फिजिसियन डा. भोजराज अधिकारीले रक्तदानको महत्व, यसको फाइदा तथा को–को व्यक्तिले रक्तदान गर्न मिल्छ भन्ने विषयमा जानकारी गराउनुभएको थियो। रक्तदान कार्यक्रममा १६ जना महिला सहित कुल ५७ जनाले रक्तदान गरेका थिए।
