-शंकर अधिकारी

भरतपुर/मध्यपूर्वमा जारी युद्धका कारण निर्माण उद्योगमा प्रयोग हुने डिजेल, पेट्रोल, मट्टितेल लगायतका इन्धन सामाग्रीहरूमा पटक पटक भइरहेको अत्यधिक एवं अप्रत्याशित मूल्यवृद्धिले गर्दा निर्माण उद्योग ठप्प हुने स्थितिमा पुगेकोप्रति निर्माण व्यवसायी संघ चितवनले नेपाल सरकार सहित सम्बन्धित सबै निकायको गम्भीर ध्यानाकर्षण भएको जनाएको छ ।
संघका महासचिव पुस्कर अधिकारीद्वारा जारी विज्ञप्तिमा इन्धनजन्य सामाग्रीहरू सहित निर्माण कार्यमा व्यापक प्रयोग हुने बिटुमिन, सिमेन्ट, डण्डी लगायतका सवै निर्माण सामाग्रीहरूमा समेत प्रभाव परी यसवाट निरन्तर भइरहेको अप्रत्याशित एवं अत्यधिक मूल्यवृद्धि र बजारमा उक्त सामाग्रीहरूको चरम अभावले निर्माण उद्योग ठप्प हुने स्थितिमा पुगेको जनाईएको छ ।

देशका विभिन्न ठाउँका क्रसर उद्योगमा देखिएको समस्याले निर्माण उद्योगहरु थप आक्रान्त भएको छ । निर्माण उद्योगहरुमा परेको यस्तो विषम परिस्थितिका विषयमा केन्द्रीय महासंघ लगायत प्रदेश महासंघ र जिल्ला संघहरुले बारम्बार नेपाल सरकार र मातहतका निकायहरूमा बारम्बार मौखीक एवं लिखित पत्राचार गरेतापनि समस्या समाधान हुने गरी अहिले सम्म कहीँ कतै सुनुवाइ एवं समस्या समाधानमा केही पनि कार्यान्वयन नभएको परिस्थितीको व्यहोरा अवगत गराउने विज्ञप्तिमा उल्लेख छ । विज्ञप्तिमा ठेक्काको मूल्य समायोजन, राष्ट्र बैंकको मूल्य सूचकाङ्क अनुसार हुने भएकाले बजारमा निर्माण सामाग्रीहरूको चरम मूल्यवृद्धि भएतापनि राष्ट्र बैंकको इन्डेक्समा उक्त सामाग्रीहरूको मूल्य घटेको देखाइने प्रचलनका कारण निर्माण उद्योगमा थप संकट देखिएको, अतः निर्माण कार्य तीव्र रुपमा हुने समयमै इन्धन सामग्रीहरू सहित निर्माण सामाग्रीहरूमा निरन्तर भइरहेका अत्यधिक मूल्यवृद्धि एवं चरम अभावले निर्माण व्यवसायीहरूलाई ठूलो आर्थिक भार एवं समस्या परेको हुँदा निर्माण उद्योगमा ‘आपतकाल’ घोषणा गरी व्यवसायीहरूलाई अविलम्ब राहत दिन यस संघ नेपाल सरकार समक्ष जोडदार माग गरिएको छ । प्रत्येक आयोजनामा मूल्यवृद्धि भए अनुरुप हालको कानूनी व्यवस्थाबाट मूल्य समायोजन हुन नसक्ने हुँदा मूल्य समायोजनको मार्ग निर्देशिका—२ तत्काल जारी गर्न र सबै अवधिका ठेक्काको हकमा मूल्य समायोजनको व्यवस्था गरी मूल्यवृद्धिको समस्याबाट पीडित सबै तह र तप्काका निर्माण व्यवसायीहरूको समस्या यथासिघ्र सम्बोधन गर्न हामी नेपाल सरकार समक्ष गरिएको विज्ञप्तिमा उल्लेख छ ।