काठमाडौं/ गैर आवासीय नेपाली संघ (एनआरएनए) को आगामी १२औँ विश्व महाधिवेशनका लागि अन्तर्राष्ट्रिय समन्वय परिषद् ९आईसीसी० उपाध्यक्ष पदमा रोजिना प्रधान राईले उम्मेदवारी दर्ता गरेकी छन्। मार्च १४, १५ र १६ मा काठमाडौंमा हुने एनआरएनएको १२औँ विश्व सम्मेलन तथा महाधिवेशनबाट संघको नयाँ नेतृत्व चयन हुँदैछ। सोही महाधिवेशनलाई लक्षित गर्दै राईले खुला तर्फको उपाध्यक्ष पदमा आफ्नो उम्मेदवारी सार्वजनिक गरेकी हुन्।

सन् २००३ मा “नेपालका लागि नेपाली” भन्ने मूलमन्त्रका साथ स्थापना भएको एनआरएनएमा राई सन् २००७ देखि निरन्तर सक्रिय रहँदै विभिन्न जिम्मेवारीमा काम गर्दै आएकी छन्। पछिल्लो ११औँ महाधिवेशनबाट उनी महिला उपाध्यक्षमा निर्वाचित भएकी थिइन्। उक्त जिम्मेवारीलाई उनले केवल पदका रूपमा नभई प्रवासी नेपाली समुदायको विश्वास र भरोसाको प्रतिनिधित्वका रूपमा लिएको बताएकी छन्।

संस्थाभित्र देखिएका चुनौती र मतभेदका बीच पनि राईले सधैँ बृहत् एकता, पारदर्शिता र संस्थागत सुदृढीकरणको पक्षमा आवाज उठाउँदै आएको बताइन्छ। महिला उपाध्यक्षका रूपमा कार्यरत रहँदा उनले महिलामात्र होइन, सम्पूर्ण प्रवासी नेपाली समुदायलाई जोड्ने अभियानमा सक्रिय भूमिका खेलेकी थिइन्।राईका अनुसार एनआरएनए कुनै व्यक्ति वा समूहको संस्था नभई विश्वभर छरिएका नेपालीहरूको साझा मञ्च हो। यही मञ्चलाई अझ सशक्त, एकीकृत र प्रभावकारी बनाउँदै विश्वभर रहेका नेपालीको आवाजलाई संगठित रूपमा अगाडि बढाउनु अहिलेको आवश्यकता भएको उनले बताएकी छन्। उनले “एक पटकको नेपाली सधैँको नेपाली” भन्ने भावनालाई अझ विस्तार गर्दै विश्वभर छरिएका नेपाली र तिनका सन्तानलाई सम्मानित नेपालीका रूपमा स्थापित गर्ने अभियानलाई सशक्त बनाउने प्रतिबद्धता व्यक्त गरेकी छन्। साथै प्रवासी नेपालीको अनुभव, सीप र सम्भावनालाई नेपालसँग जोड्दै समृद्ध र संस्कारित नेपाल निर्माणको यात्रामा योगदान पुर्‍याउने आफ्नो लक्ष्य रहेको उनले उल्लेख गरेकी छन्।
राईका अनुसार उपाध्यक्ष पदमा उम्मेदवारी दिनु व्यक्तिगत महत्वाकांक्षाको विषय मात्र नभई एनआरएनएको दीर्घकालीन हित, संस्थागत स्थायित्व र प्रवासी नेपाली समुदायको साझा आकांक्षालाई अघि बढाउने जिम्मेवारी हो। १२औँ महाधिवेशनले एनआरएनएको भावी दिशा तय गर्ने महत्वपूर्ण अवसर भएको उल्लेख गर्दै उनले विश्वभर रहेका एनआरएन अभियन्ता, अग्रज, सहकर्मी तथा शुभेच्छुकहरूसँग साथ, विश्वास र सहयोगको अपेक्षा गरेकी छन्। उनका अनुसार एनआरएनएको यात्रा केवल व्यक्तिगत अभियान नभई विश्वभर छरिएका नेपालीहरूको साझा उत्तरदायित्व र सामूहिक प्रयासको प्रतीक हो, जसलाई अझ मजबुत बनाउने संकल्पसहित आफू उम्मेदवारीमा उत्रिएको बताएकी छन्।