“व्यवसायिक सुन्तला खेतीको सम्भावना, अवसर र चुनौती” विषयक प्यानल छलफल कार्यक्रम सम्पन्न
मुग्लिङ÷चितवन उद्योग संघ इच्छाकामना समिति र होटल व्यवसायी संघ इच्छाकामना इकाइ समितिको आयोजनामा दोश्रो इच्छाकामना सुन्तला महोत्सव तथा फुड फेस्टिवल २०८२ को दोश्रो दिन “व्यवसायिक सुन्तला खेतीको सम्भावना, अवसर र चुनौती” विषयक प्यानल छलफल कार्यक्रम सम्पन्न भएको छ ।
चितवन उद्योग संघका उपाध्यक्ष एवम् नीति निर्माण तथा पाठशाला विभागका विभागीय प्रमुख गोपाल प्रसाद गैरेको अध्यक्षतामा सम्पन्न कार्यक्रममा इच्छाकामना गाउँपालिकाका उपाध्यक्ष माया सिलवाल प्रमुख अतिथि रहनु भएको थियो । प्रमुख अतिथि सिलवालले महोत्सव अन्तर्गत भएको यस्ता खाले प्यानल छलफलले वास्तविक किसानहरुको समस्याहरुलाई उजागर गरी कृषकहरुमा कृषिसँग सम्बन्धित गुनासाहरुको समाधानसँगै कृषकहरुलाई पर्ने आवश्यक नीति, कानून र प्रविधिहरुको विषयमा जानकारी हुने विश्वास व्यक्त गर्नुभयो ।
कार्यक्रमा वागमती प्रदेश सभा सदस्य मायादेवी शर्मा, चितवन उद्योग संघका पूर्व अध्यक्ष हरिप्रसाद सुवेदी लगायतले प्यानल छलफलसँगै सुन्तला महोत्सवको सफलताको शुभकामना व्यक्त गरेका थिए ।
राष्ट्रिय फलफुल विकास केन्द्रका प्रमुख एवम् आयोजना निर्देशक, पहाडी क्षेत्र काष्ठफल तथा फलफूल विकास आयोजना किर्तिपुरका प्रमुख महेश चन्द्र आचार्य मुख्य वक्ता रहनु भएको प्यालन छलफल कार्यक्रममा राष्ट्रिय कृषि आधुनिकीकरण कार्यक्रम, कार्यक्रम कार्यान्वयन इकाई नवलपरासी बर्दघाट सुस्ता पूर्वका बरिष्ठ कृषि अधिकृत एवम् सुन्तला विज्ञ डा.देवराज अधिकारी, कृषि विकास कार्यालय, चितवनका कार्यालय प्रमुख झलकनाथ कँडेल, पहाडी क्षेत्र काष्ठफल तथा फलफूल विकास आयोजना किर्तिपुरका बरिष्ठ वागवानी विकास अधिकृत सूर्य प्रसाद वराल, इच्छाकामना गाउँपालिका कार्यालयका कृषि अधिकृत आशिष त्रिपाठी, माझगाउँ कृषक समूह, इच्छाकामनाका अध्यक्ष तिलक बहादुर गुरुङ प्यानलिष्टको रुपमा रहनु भएको थियो । कार्यक्रममा चितवन अपडेट अनलाइनका प्रधान सम्पादक, पत्रकार समीर चापागाईले सहजकर्ताको भूमिकामा रहनु भएको थियो ।
महोत्सवकै दोश्रो दिन गायक चन्द्र परियारको नेतृत्वमा आएका पवनश्री परियार, सिता वि.सि., सरु रसाइली, सन्तोष भुषाल लगायतका टोली, गायक सुमन रोक्का, इच्छाकामना चेपाङ्ग समूहको नृत्यका साथै स्थानीय एपोलो ब्याण्डले साँगीतिक प्रस्तुति गरेका थिए ।
चितवन उद्योग संघका कार्यक्रम अधिकृत कल्पना आचार्यले सञ्चालन गर्नुभएको कार्यक्रमलाई चितवन उद्योग संघ इच्छाकामना समितिका अध्यक्ष रामहरि कँडेलले धन्यवाद मन्तव्य सहित समापन गर्नुभएको थियो ।
