चितवन/नगरपालिकास्थित बघौडा अस्पतालमा गत बिहीबार राति चिकित्सक र स्वास्थ्यकर्मीमाथि आक्रमण गर्नेलाई प्रहरीले पक्राउ गरेको छ। मादक पदार्थ सेवन गरी आक्रमण गरेका चार जना युवालाई माडी इलाका प्रहरी कार्यालयले नियन्त्रणमा लिएको हो।

बघौडा अस्पतालका निमित्त मेडिकल सुपरिटेन्डेन्ट डा धीरञ्जनकुमार साहका अनुसार, युवाले मादक पदार्थ सेवन गरी डा दीपेन्द्र विश्वास, डा देवेन्द्र विश्वास, हे.अ. अनुप सुवेदी र कविराज तिवारीलगायत चिकित्सक र स्वास्थ्यकर्मीमाथि घाउचोट हुने गरी कुटपिट गरेका थिए। आक्रमणकारीहरूले अपशब्द बोल्दै गालीगलौज गरेको समेत डा साहले जानकारी दिनुभयो।

प्रहरी निरीक्षक राईले चिकित्सकहरूले कुटपिटको मुद्दा अदालतमार्फत चलाउन सकिने कुरा स्पष्ट पार्नुभयो। नेपाल चिकित्सक सङ्घ चितवनका वरिष्ठ उपाध्यक्ष डा दीपेन्द्र न्यौपानेले दोषीलाई कानुनअनुसार हदैसम्मको कारबाही हुनुपर्ने बताउनुभयो। प्रहरीले घटनाबारे विस्तृत अनुसन्धान गरिरहेको जनाएको छ। यस घटनाले स्वास्थ्य क्षेत्रमा कार्यरत चिकित्सक र स्वास्थ्यकर्मीको सुरक्षा र सम्मानको गम्भीर प्रश्न उठाएको छ।