चितवन/प्रगतिशील राष्ट्रिय अभियान नेपाल ले आइतबार चितवनमा पत्रकार सम्मेलन आयोजना गर्दै पूर्व मन्त्री जनार्दन शर्मा नेतृत्वमा अभियानको औपचारिक परिचय गराएको छ। कार्यक्रममा प्रमुख अतिथि यज्ञ घिमिरे, नेता सुलचन पौडेल, ऋषि राम चापागाईं, अभियान समन्वयक दिपक शाहि र अभियानसँग आबद्ध जेन्जीहरू पनि उपस्थित थिए।
अभियानका प्रतिनिधिहरूले यस पहलको उद्देश्य सुशासन, आर्थिक रुपान्तरण, सामाजिक न्याय र युवाको सक्रिय सहभागिता रहेको जानकारी दिएका छन्। उनीहरूले अभियानले देशभर जनसरोकारका मुद्दामा संवाद, सदस्यता विस्तार र जनसामान्यसँग प्रत्यक्ष अन्तरक्रिया गर्ने योजना बनाएको बताए।
कार्यक्रममा उपस्थित अतिथिहरूले अभियानलाई सफल बनाउन र समाजमा सकारात्मक परिवर्तन ल्याउन नागरिकको सहभागिता आवश्यक रहेको औंल्याए। यज्ञ घिमिरेले अभियानको महत्व, सुलचन पौडेलले राजनीतिक स्थायित्व र विकासमा युवाको भूमिकालाई जोड दिए भने ऋषि राम चापागाईंले अभियानको जनसरोकारमुखी दृष्टिकोणलाई समर्थन गरे।
अभियान समन्वयक दिपक शाहि ले आगामी दिनमा राष्ट्रिय स्तरमा कार्यक्रम सञ्चालन, सदस्यता अभियान र जनजागरण गतिविधिहरू गरिने जानकारी दिए। उपस्थित जेन्जीहरूले पनि अभियानमा आफ्नो सक्रिय सहभागिता जनाउने प्रतिबद्धता व्यक्त गरे।
कार्यक्रममा स्थानीय पत्रकार, नागरिक समाजका प्रतिनिधि र युवा समूहहरू सहभागी थिए। आयोजकहरूले अभियानले देशमा पारदर्शी, जवाफदेही र विकासमुखी शासन प्रणाली निर्माणमा योगदान पुर्याउने विश्वास व्यक्त गरेका छन्।
Advertisement
