भारतीय गायिका पलक मुच्छल मार्मिक गीत र सुरिलो आवाजका लागि परिचित छिन्। उनले अब गिनिज बुक अफ वर्ल्ड रेकर्ड्स र लिम्का बुक अफ रेकर्ड्समा नाम लेखाएकी छन्। यो सम्मान उनलाई संगीतको लागि होइन, असाधारण मानवीय कार्यको लागि प्रदान गरिएको हो।  उनले पलक पलाश च्यारिटेबल फाउन्डेसनमार्फत भारतसहित विश्वभरका विपन्न बालबालिकाका लागि ३८ सयभन्दा बढी मुटुको शल्यक्रिया गर्न आर्थिक सहयोग गरेको भन्दै सम्मान दिइएको हो। पलकले संगीतप्रतिको लगावलाई जीवनभर करुणाको अभियानमा बदलिदिएको छ।

पलकका अनुसार दान यात्रा सानै उमेरमा सुरु भएको थियो। बाल्यकालमा रेल यात्रामा विपन्न बालबालिकासँग भेटिएपछि उनको जीवन बाटो फेरियो। उनले त्यस दिन आफैंसँग मौन वाचा गरिन्, ‘म कुनै दिन उनीहरूलाई मद्दत गर्नेछु।’ वर्षौंपछि यो वाचा फाउन्डेसनको प्रेरक शक्ति बन्यो, जसले प्रत्येक कन्सर्ट कमाई र व्यक्तिगत बचतलाई जीवन बचाउने काममा खर्च गर्छ।

उनको उदारता एउटै उद्देश्यमा सीमित छैन। उनले भारतमा सहिद परिवारलाई पनि सहयोग गर्दै आएकी छिन्। गुजरात भूकम्प पीडितका लागि १० लाख रुपैयाँ योगदान गरेकी थिइन्। सामाजिक कल्याणप्रतिको उनको प्रतिबद्धता सहानुभूतिमा गहिरो जरा गाडिएको छ। यसलाई निरन्तरता दिने उनको भनाइ छ।

‘मेरी आशिकी’, ‘कौन तुझे’ र ‘प्रेम रतन धन पायो’ जस्ता गीतबाट सांगीतिक करियर उचाइमा पुग्दा पनि पलकले कमाई र ऊर्जा फाउन्डेसनमा समर्पित गरिरहिन्। उनको नाम लिम्का बुक अफ रेकर्ड्समा पनि छ, जुन व्यावसायिक उपलब्धिसँगै मानवीय कार्यप्रतिको समर्पणको प्रमाण हो। पलकका श्रीमान् संगीतकार मिथुन हुन्, जो परोपकारी यात्रामा अटल साझेदार छन्। उनले एक पटक टिप्पणी गरेका थिए, ‘यदि कुनै कार्यक्रम छैन, आम्दानी छैन भने पनि-बच्चाको शल्यक्रिया कहिल्यै रोकिने छैन।’ एजेन्सी