१५१ ओ विश्व हुलाक दिवस चितवनमा विभिन्न कार्यक्रमहरु आयोजना गरि मनाइएको छ । जिल्ला हुलाक कार्यालय चितवनले दिवसका अवसरमा विहिवार भरतपुरमा शुभकामना तथा पुरस्कार वितरण कार्यक्रम आयोजना गरेको हो । कार्यक्रममा बोल्ने बक्ताहरुले ऐतिहासिक महत्व बोकेको हुलाक सेवालाई समय सापेक्ष सूचना र प्रविधि मैत्री बनाएर लैजानुपर्ने धारणा राख्नुभयो । नेपाल पत्रकार महासंघका वरिष्ठ उपाध्यक्ष दिपक आचार्यले हुलाक सेवाले गरेको द्रुत विकासले सूचनाको विकासमा ठूलो सहयोग पुगेको धारणा राख्नुभयो । “अहिलेको आवश्यकता भनेको हुलाकलाई अत्याधुनिक र सुचना प्रविधी मैत्री बनाउनु हो”, उहाँले भन्नुभयो । हुलाकले अहिले सञ्चार माध्यमहरुमा आई रहेका विज्ञापनको अनुगमन गर्न जरुरी रहेको उल्लेख गर्दै उहाँले एजेन्ट मार्फत गरिने विज्ञापन निति रोकिनु पर्ने धारणा राख्नुभयो । कार्यक्रममा बोल्दै चितवनका प्रमुख जिल्ला अधिकारी गणेश अर्यालले गौरवशाली ईतिहास बोकेको हुलाक अहिले अस्तित्व स्थापितका लागी शघर्ष गरिरहेको बताउनुभायो । “समय र परिस्थिति अनुसार परिस्कृत हुन नसक्ने हो भने भोलि संकटमा पर्न सकिन्छ । हुलाकले समय सापेक्ष सुधार गरेर अगाडि बढ्न जरुरी छ”, उहाँले भन्नुभयो । कार्यक्रममा बोल्दै जिल्ला हुलाक कार्यलय भरतपुरका प्रमुख हुलाक अधिकृत नरहरी सापकोटाले हुलाकले धेरै अन्तराष्ट्रिय संस्थाहरुसगको सम्वन्धमा साझेदारी गरेर अगाडि वढेको हुदा यो प्रभावकारी रुपमा अगाडि वढेको बताउनुभयो । कार्यक्रममा कोष तथा लेखा नियन्त्रण कार्यालय चितवनका प्रमुख यमनारायण शर्मा, जिल्ला खेलकूद विकास समितिका प्रमुख रामजी ढकाल लगाएतले मन्तब्य ब्यक्त गर्नुभएको थियो । विश्व हुलाक दिवसका अवसरमा सञ्चारकर्मी र निजामति कर्मचारीहरु विच मैत्रीपूर्ण ब्याटमिन्टन प्रतियोगिता, वीपी कोइराला मेमोरियल क्यान्सर अस्पतालमा फलफूल वितरण, तिन दिन सम्म कार्यलयमा द्विप प्रज्वलन लगाएतका कार्यक्रम आयोजना गरिएको थियो । समापन कार्यक्रममा प्रतियोगिता विजेता तथा उत्कृष्ट कर्मचारीहरुलाई सम्मान गरिएको थियो ।