काठमाडौं/जेन–जी आन्दोलनमा गोली प्रहारबाट युवाहरूको मृत्यु भएपछि तत्कालीन प्रधानमन्त्री केपी शर्मा ओली र गृहमन्त्री रमेश लेखकमाथि अनुसन्धान अघि बढाउने कि नबढाउने भन्ने विषयमा सरकार अन्योलमा परेको छ । सहिद परिवार र आन्दोलनका अगुवाले तत्काल पक्राउ र कारबाहीको माग गरे पनि प्रधानमन्त्री सुशीला कार्की र गृहमन्त्री ओम प्रकाश अर्यालको सकारात्मक धारणाबीच सुरक्षा अधिकारी र कानुनविद्ले भने जाँचबुझ आयोगको प्रतिवेदन पर्खन सुझाव दिएका छन् ।

मंगलबार चार सहिद परिवारले दिएको किटानी जाहेरी प्रहरीमार्फत जाँचबुझ आयोगमा पठाइएको छ । आयोगका अध्यक्ष पूर्वन्यायाधीश गौरीबहादुर कार्कीले फौजदारी अनुसन्धानमा प्रहरी स्वतन्त्र भएको स्पष्ट पारेका छन् । तर, तत्कालीन प्रधानमन्त्री र गृहमन्त्रीमाथि अनुसन्धान अघि बढाउँदा सुरक्षा चुनौती बढ्न सक्ने आकलन सुरक्षा निकायले गरेको छ ।

सोमबार जेन–जीका कार्यकर्ता जाहेरी लिएर जिल्ला प्रहरी कार्यालय पुगेका थिए । प्रहरीले जाहेरी लिन अस्वीकार गरेपछि विवाद चर्किएको थियो । त्यसपछि प्रधानमन्त्री कार्की, गृहमन्त्री अर्याल र सुरक्षा निकायका प्रमुखबीच बालुवाटारमा बैठक बसेको थियो । बैठकमा अधिकारीहरूले आयोगको कार्यादेश चलिरहेकाले छुट्टै अनुसन्धानले राजनीतिक तनाव र मुठभेट बढाउन सक्ने चेतावनी दिएका थिए ।

मंगलबार प्रहरी परिसरले जाहेरी बुझेर पनि दर्ता नगरी आयोगमा पठाएको छ । एसपी पवन भट्टराईले क्षेत्राधिकार दोहोरिन सक्ने भएकाले जाहेरी आयोगमा पठाइएको बताए । गृहका स्रोतका अनुसार प्रधानमन्त्री कार्की र गृहमन्त्री अर्याल अनुसन्धानका पक्षमा भए पनि तत्काल अघि बढाउने कि आयोगको प्रतिवेदन कुर्ने भन्नेमा सरकार विभाजित छ । यसबीच, जाँचबुझ आयोगले मंगलबार विज्ञप्ति जारी गर्दै फौजदारी अनुसन्धानका लागि आफ्नो प्रतिवेदन कुर्नु नपर्ने स्पष्ट पारेको छ ।

आयोगका प्रवक्ता विज्ञानराज शर्माका अनुसार आयोग घटनाको विश्लेषण मात्र गर्ने हो, अनुसन्धान गर्ने अधिकार भने प्रहरीसँगै रहनेछ । आयोगले आन्दोलनका दिन खटिएका नेपाल प्रहरी, सशस्त्र प्रहरी र राष्ट्रिय अनुसन्धानका टोलीहरूको विवरण र सञ्चार टाइमलाइन माग गरेको छ । आयोगले तत्कालीन प्रधानमन्त्री ओली, गृहमन्त्री लेखक, गृहसचिव गोकर्णमणि दुवाडी, गुप्तचर प्रमुख हुतराज थापा र काठमाडौंका सिडिओ छविलाल रिजाललाई विदेश जान रोक लगाएको छ । उता, सिंहदरबारमा आगजनी गराएको आरोपमा एमाले कार्यकर्ताले काठमाडौंका मेयर बालेन शाह र हामी नेपाल संयोजक सुदन गुरुङविरुद्ध जाहेरी दिएका छन् । तर, प्रहरीले उक्त जाहेरी केरमेट अपूर्ण भन्दै नदर्ता गरी ‘होल्ड’मा राखेको जनाएको छ ।