भरतपुर/सुशासन, रोजगारीको ग्यारेन्टी, भ्रष्टाचारको अन्त्य, अभिव्यक्ति स्वतन्त्रता जस्ता विषय राखेर भविष्यका कर्णधार जेन–जी पुस्ताका युवाहरुले स्वतस्र्फूत रुपमा मिति २०८२ भाद्र २३ गते गरेको आन्दोलनमा सरकारले अनावश्यक बल प्रयोग गरी हुन गएको घटनामा ठूलो मानवीय क्षति भई हालसम्म १९ जना युवाहरुको ज्यान गएको र ४२१ भन्दा बढी युवाहरु घाइते भएको घटना प्रति चितवन उद्योग संघ स्तब्ध भएको छ ।

चितवन उद्योग संघका अध्यक्ष मदन घिमिरेद्वारा जारी विज्ञप्तिमा स्वदेशमा नै गरिखाने वातावरण बन्नुपर्छ र वर्षौ देखिको वेथिति तथा भ्रष्टाचार अन्त्य भई सुशासन कायम हुनुपर्छ भनि गरिएको यस आन्दोलनमा सरकार पक्षबाट भएको अनावश्यक बल प्रयोगबाट हुन गएको जनधनको क्षतिप्रति चितवन उद्योग संघ स्तब्ध भएको जनाइएको छ ।

विज्ञप्तिमा आन्दोलनका क्रममा ज्यान गुमाएका होनहार युवाहरुप्रति भावपूर्ण श्रद्धाञ्जली अर्पण गर्दै शोक सन्तप्त परिवारजनमा गहिरो समवेदना प्रकट गर्दछौं । मृत्युवरण गर्ने युवाहरुको परिवारलाई उचित क्षतिपूर्ति दिन र घाईतेहरुकोे सम्पूर्ण उपचार खर्च राज्यद्वारा निःशुल्क व्यवस्था गर्न सरकारसँग जोडदार माग गर्दै घाईते युवाहरुको शिघ्र स्वास्थ्य लाभको कामना गरिएको छ ।

राज्यले आम युवापुस्तामा देखिएको चरम नैराश्यता, बेरोजगारीलाई सम्बोधन नगरी असावधानीपूर्ण व्यवहारका कारण हिजोको दुःखद घटना भएको हाम्रो ठहर छ । आर्थिक मन्दीका कारण शिथिल अर्थतन्त्र बिस्तारै लयमा फर्कनै लाग्दा र नेपालीहरुको महान चाडबार्डहरु नजिकिँदै गरेको वर्तमान समयमा भएको यस दुःखद घटनाले सम्पूर्ण निजी क्षेत्रलाई दुखित बनाएको विज्ञप्तिमा उल्लेख छ ।

कुनैपनि समस्याको समाधान हिंसाबाट हुँदैन, आन्दोलनरत जेन–जी पुस्ताका युवाहरुलाई आन्दोलनको स्वरुप शान्त, अनुशासित र संयमित बनाउन तथा राज्य पक्षलाई दमनबाट होइन वार्ताद्वारा उचित मागहरु सम्बोधन गर्न अनुरोध गर्दछौं । राजश्व बृद्धिमा महत्वपूर्ण योगदान दिँदै आएको उद्योग, व्यवसाय क्षेत्र नियमित सञ्चालन गरी उद्योग, व्यापारको चक्रलाई बिथोलिन नदिई, निजी क्षेत्रलाई उद्यमशिलताबाट पलायन हुने अवस्था आउन नदिन सम्पूर्ण राजनीतिक दल र सम्बद्ध सरोकारवाला पक्षहरुलाई संघद्वारा जारी विज्ञप्तिमा उल्लेख गरिएको छ ।