चितवन/चितवन उद्योग संघ खैरहनी समितिले तिजको अवसरमा लघु उद्यमीहरु र खेलाडीहरुलाई सम्मान गरेको छ । खैरहनी नगरपालिकाको सहयोगमा उद्योग संघले खैरहनीले खैरहनीका ३ जना उद्यमी , एकवटा साझेदारी फार्म र दुईजना खेलाडीलाई सम्मान गरेको हो । तिजको अवसरमा आयोजित सम्मान तथा तिज विशेष सास्कृतिक कार्यक्रममा खैरहनीका नगर प्रमुख शशी कुमार खनिया , उप प्रमुख कविता उप्रेती , प्रमुख प्रशासकिय अधिकृत विष्णु प्रसाद सापकोटा , वडा नम्बर ८ का वडा अध्यक्ष शंकर कंडेल , उद्योग संघ खैरहनीकि अध्यक्ष प्रतिभा श्रेष्ठ लगायतले उनीहरुलाई सम्मान गरेका हुन् ।
संघले पौरखी महिलाको रुपमा लामो समयदेखी पर्सा बजारमा मकै पोलेर जिविकोपार्जन गर्दै आएकि शुकमाया थिङ , अपाङ्गता भएका महिलाहरुलाई साथमा लिएर लघु उद्यम व्यवसाय सन्चालन गर्दै आएकी दिलकुमारी लामा , खैरहनी २ मा तिनजना महिलाहरू मिलेर च्याउ खेती गर्दै आएका मेलमिलाप कृषि फर्म , गाईपालन गरि आफ्नो र परिवारको हेरचाह गर्दै आएकी खैरहनी ८ कि यमकुमारी बस्नेत , एथेलेटिक्स राष्ट्रिय खेलाडी मुस्कान चौधरी , तेक्वान्दो राष्ट्रिय खेलाडी ग्रिष्मा रानामगरलाई सम्मान गरेको उद्योग संघ खैरहनीकि सचिव सुस्मा शिवाकोटीले जानकारी दिइन् । ६ जना सम्मानको सुचिमा रहेकोमा आज उपस्थित हुन नसकेका दुईजना शुकमाया थिङ र यम कुमारी बस्नेतमा घरमै पुगेर नगद र सम्मान पत्र प्रदान गरिने उनले बताइन् ।
कार्यक्रममा बोल्दै खैरहनी नगरपालिका उप प्रमुख कविता उप्रेतीले तिजको अवसरमा फरक किसिमको सोचको साथ महिला उद्यमीहरुलाई सम्मान गर्ने कार्यक्रम ल्याएकोमा खुशी व्यक्त गरिन । महिलाहरुले केहि गर्न सक्दैनन् भन्ने सङ्कृण सोच भएकाहरुलाई अहिले महिलाहरु उद्यमी भएको , विभिन्न माथिल्लो पदमा पुगेकोले देखेपछि महिलाहरु पनि सबल र सक्षम छ्न भन्ने पुष्टि गरेको उनले बताइन् ।
कार्यक्रममा बोक्दै नगर प्रमुख शशी कुमार खनियाले ठुला पदमा भएका महिला होइन दैनिक रुपमा संघर्ष गर्दै काम गर्दै आएका महिलाहरुलाई उद्योग संघले सम्मान गरेकोमा खुसी व्यक्त गर्दै आगामी दिनमा यस्ता कार्यक्रममा थप सहकार्य गर्ने बताए । एकदिन कार्यक्रम गर्दैमा महिलाको हित नहुने भन्दै सुस्म ढंगले काम गर्नुपर्ने औल्याए ।
चितवन उद्योग संघ महिला उद्यमी मंचकि अध्यक्ष सिर्जना वस्तीले महिलाहरु घरको चुलोचौकोमात्रैमा सिमित हुने गरेकोमा अहिले उद्यमशील हुँदै गएको बताइन् । उद्यमशीलतामा लागे घरव्यवहार चलाउन सकिने भन्दै महिलाहरुलाई उद्यमी बन्न प्रेरित गर्नुपर्नेमा जोड दिइन् । उद्यमी भन्दा लघु उद्यमी महिलाहरूलाई प्राथमिकता दिदै सम्मान गर्दा अन्यलाई प्रेरणा मिल्ने र उत्साहित हुने विश्वास व्यक्त गरिन । चितवन उद्योग संघ खैरहनीकि अध्यक्ष प्रतिभा श्रेष्ठको अध्यक्षतामा भएको कार्यक्रममा लक्ष्मी थापा खरालले धन्यवाद मन्तव्य राखेकी थिइन् ।
