चितवन/चितवनको इच्छाकामना गाउँपालिका–५ तुइनखोला नजिकैको नारायणगढ–मुग्लिङ सडक खण्डमा आज बिहान सुख्खा पहिरो खस्दा सडक दुबै तर्फ अवरुद्ध भएको छ । बिहान करिब ४ः२० बजे माथिबाट ठूला–ठूला ढुंगासहित पहिरो खस्दा आवागमन रोकिएको हो ।
पानी नपरेको अवस्थामै ढुंगा खसिरहेको हुँदा सडकमा यात्रा जोखिमपूर्ण बनेको प्रहरीले जनाएको छ । सडक खुलाउन सडक विभागसँग समन्वय भइसकेको र ढुंगा हटाउने कार्य सुरु भएको जिल्ला प्रहरी कार्यालय चितवनले जनाएको छ ।
कार्यालयका सूचना अधिकारी डिएसपी रविन्द्र खनालका अनुसार अवरुद्ध स्थान मुग्लिङ बजारदेखि करिब २.५ किलोमिटर दक्षिणतर्फ पर्दछ । उहाँका अनुसार पहिरोमा ठूलो–ठूलो ढुंगा खसेको हुँदा हटाउन केही समय लाग्नेछ । “ढुंगा पन्छाउने क्रममा तल खाली गर्दा थप ढुंगा खस्ने भएकाले करिब एक घण्टा लाग्न सक्छ ।” खनालले भन्नुभयो।
यसअघि सोही स्थानमा लगातार ढुंगा खस्दा दुर्घटना भएका थिए। शुक्रबार खसेको ढुंगा ट्रकमा पर्दा तीन जना घाइते भएका थिए, जसमा एक जनाको अवस्था गम्भीर छ भने ट्रकमा समेत क्षति पुगेको थियो। त्यस्तै, शनिबार साँझ पुनः ढुंगा खस्दा स्कुटरमा सवार दुई जनामध्ये एक जना घाइते भएका थिए र स्कुटरमा समेत क्षति भएको थियो ।
