विराटनगर /नेपाली कांग्रेसका नेता बालकृष्ण खाँडले नेपाली कांग्रेस कमजोर हुँदा मुलुकको प्रजातान्त्रिक पद्धति नै कमजोर हुने बताएका छन्। बुधबार विराटनगरस्थित कोइराला निवासमा आयोजित पत्रकार सम्मेलनका क्रममा नेता खाँडले पार्टीभित्रको अनुशासनको कारबाही प्रक्रियागत रूपमा भएको बताएका हुन्। पत्रकार  सम्मेलनमा नेता खाँडले अनुशासन समितिले कारबाही गर्नु र कुरा उठ्नु स्वाभाविक भएको स्पष्ट पारे। अनुशासन समितिले गरेको कारबाहीको मुद्दामा उनले भने, “कुनै पनि पार्टीको जिम्मेवार निकायले एकपक्षीय वा पक्षपातपूर्ण व्यवहार गर्नुहुँदैन। कांग्रेस मुलुकको ऐतिहासिक प्रजातान्त्रिक पार्टी हो। कांग्रेस कमजोर हुँदा नेता र कार्यकर्ता मात्र कमजोर हुँदैन, पार्टी कमजोर हुँदा मुलुकको प्रजातान्त्रिक पद्धति नै कमजोर हुनेछ।”

उनले अनुशासन समितिले यसअघि काम नै गरेन भन्ने देखिँदै आएकोमा अहिलेको कारबाहीले समितिको औचित्य पुष्टि गर्ने बताए। समितिले कारबाहीको प्रतिवेदन केन्द्रीय समितिमा बुझाउने र त्यहाँ फेरि समीक्षा र छलफल हुने उनको भनाइ थियो।

ता खाँडले पार्टीको १५औँ महाधिवेशन थप एक वर्ष लम्बिन सक्ने सङ्केत गरे। “पार्टी विधानले चार वर्षभित्र महाधिवेशन हुनुपर्ने राखेको छ। विशेष परिस्थिति हुँदा एक वर्ष थप गरी पाँच वर्षसम्ममा गर्न सकिन्छ,” उनले भने, “विगतको ११ देखि १४औँ महाधिवेशन पनि एक वर्ष थप गरी गरिएको हो। त्यसैले अहिले हाम्रो १५औँ महाधिवेशन पनि पार्टीको सबै तहको कार्यकाल एक वर्ष थप गरी पाँच वर्षभित्र हुनेछ।”

पार्टी संस्थापन वा पार्टी सभापतिसँगको दूरी बढ्दै गएको विषयमा खाँडले सभापतिलाई सहयोग गर्दै पार्टी बलियो बनाउने बताए। विराटनगरमा डा. शेखर कोइरालाको निवासमा आएको विषय अर्थपूर्ण रहेकोमा उनले भने, “पार्टी नेता शेखर कोइराला यहाँ बस्नुहुन्छ। तर यहाँ पहिले बीपी कोइराला, गिरीजाप्रसाद कोइराला, बुवा कृष्णप्रसाद कोइराला पनि बस्नुहुन्थ्यो। कोइराला सम्झँदा मेयर नागेश कोइराला मात्र सम्झनु भएन। यहाँ सबै कोइरालालाई सम्झनुपर्छ। उहाँहरूसँग भावनात्मक सम्बन्ध छ। उहाँहरू हाम्रो लागि महामानव हो। निवासलाई पार्टीको गुटको रूपमा हेर्नुहुँदैन। यो हाम्रो लागि धार्मिकस्थल गएझैँ पवित्रस्थल हो।” खाँडले आउँदो २०८४ सालको आमनिर्वाचनसम्म संयुक्त सरकारलाई जोगाएर अघि बढाउनुपर्नेमा जोड दिए।