चितवन/नेकपा (एमाले) चितवनले ८ औं विस्तारित बैठक तथा ७३ औं मदन जयन्ती र जरा अभियान २०८१ को समापन कार्यक्रम सम्पन्न गरेको छ । शनिबार भरतपुरमा एमाले चितवनले एकसाथ ३ कार्यक्रम सम्पन्न गरेको हो । आज सम्पन्न ८ औं विस्तारित बैठकले विभिन्न निर्णयहरु गरेको छ । साथै बैठकमा नेकपा एमालेको जरा केन्द्रित अभियानको समिक्षा गर्दै अभियानको समापन समेत गरिएको छ ।
७३ औं मदन जयन्तीको अवसर पारेर आयोजित कार्यक्रम मदन जयन्ती केन्द्रित नै बन्यो । एमाले स्थायी कमिटी सदस्य एवम् संगठन विभाग प्रमुख काशीनाथ अधिकारीले जनताको बहुदलीय जनवाद (जबज) आमुल परिवर्तनकारी लोकतान्त्रिक धारा भएको बताए ।
नेपालका समस्त कम्युनिष्ट पार्टीहरु मदन भण्डारीको विचार जबजकै मान्यतामा रहेको अधिकारीको भनाइ छ । ‘देशका नीति नियमहरु पनि जवजको मान्यता अनुसार निर्माण भएका छन्’ उनले भने । यसर्थ मदन भण्डारीको विचार जबज अझै पनि उत्तिकै सान्दर्भिक रहेको बताउँदै उनले समाजवादमा जाने मुख्य बाटो नै जबज भएको बताए ।
उनले समाजवाद ल्याउनका लागि २०८४ सहित लगातार ५ वटा निर्वाचनमा तीनै तहमा एमाले विजयी हुनुपर्ने बताए । ‘त्यसैले मिसन ८४ मात्रै होइन, मिसन २५ वर्ष हुनुपर्छ । तब बल्ल वैज्ञानिक समाजवाद आउँदछ’ उनले भने । फरक प्रसंगमा बोल्दै नेता अधिकारीले नेकपा माओवादीको अस्तित्व संकटमा पर्दै गएको बताएका छन् ।
एमाले स्थायी कमिटी सदस्य एवम् बागमती प्रदेश इन्चार्ज राजन भट्टराईले मदन भण्डारी दुरदर्शि नेता भएको बताए । मुलुक अहिले पनि एमाले र मदन भण्डारीले देखाएको बाटोमा हिडिरहेको उनको भनाइ छ ।
सामान्य अवस्थामा नभई असामान्य अवस्थामै काँग्रेस र एमाले मिलेको उनले बताए । मुलुकलाई जब जब निर्णायक अवस्थामा लैजानुपर्छ तब एमाले र काँग्र्रेस मिलेको इतिहास स्मरण गर्दै नेता भट्टराईले अहिले पनि यही भएको बताए ।
अवसरवाद र चरम अस्थिरतावादीहरुले मुलुकलाई राजनीतिक दुर्घटनातर्फ अगाडि बढाउने खतरा आइपरेपछि एमाले र काँग्रेस मिल्नुपरेको उनले बताएका छन् । ‘मिले पनि अलि अलि खटपट त रहिनै हाल्छ, तर आधारभुत तहमा यो सहकार्य ८४ सम्मै जान्छ’ उनले भने ।
देशमा पहिलाभन्दा अहिले धेरै परिवर्तन हुँदै गएको उनले बताएका छन् । देशको भौगोलिक अवस्था र वस्तुगत अवस्थालाई बुझ्दै नबुझि वा न बुझेको झैं गरी बाहिर देशका कुरा देखेर यहाँ केही भएन भन्नु कतिसम्म मिल्ने कुरा हो ? भन्दै उनले प्रश्न गरे ।