भरतपुर, ०७ असोज/भरतपुर महानगरपाकिला वडा नं.१ बागेश्वरीमा रहेको योगी नरहरिनाथ योग तथा प्राकृतिक चिकित्सालयमा कोरोना संक्रमण भई आईसोलेशनमा राखिएका बिरामीहरु कोरोनालाई परास्त गरी घर फर्किएका छन् । कोरोना परास्त गरी घर फर्किने तयारीमा रहेका बिरामीहरुलाई हौसला प्रदान गर्दै कार्यक्रमका प्रमुख अतिथि चितवन उद्योग संघका अध्यक्ष राजु पौडेल लगायतको टोलीले प्राकृतिक चिकित्सालयको अवलोकन समेत गरेको थियोे ।

प्रमुख अतिथि पौडेलले हजारौं दीर्घ रोगीहरुको मानवीय स्वास्थ्य उपचारमा समर्पित प्राकृतिक चिकित्सालयका योजना तथा कार्यक्रममा संघको तर्फबाट सधै साथ सहयोग रहने समेत बताउनुभयो ।
विश्वमा महामारीको रुपमा फैलिइरहेको कोरोना भाइरस कोभिड–१९ संक्रमित बिरामीहरुको उपचारका लागि भाद्र १४ गतेदेखि आइसोलेशन सेन्टरको रुपमा समेत सेवा प्रदान गर्दै आइरहेको उक्त प्राकृतिक चिकित्सालयमा उपचार पछि कोरोना संक्रमण मुक्त बिरामीहरुको डिस्चार्ज कार्यक्रममा अध्यक्ष पौडेलले संक्रमण मुक्त बिरामीहरुले कोरोनालाई परास्त गर्न सफल हुनुभएकोमा बधाई दिदै सुरक्षित भएर आफ्ना दैनिक जीवनयापनमा लाग्नका लागि प्रेरित गर्नुभयो । उहाँले उपचाररत बिरामीहरुको सिघ्र स्वास्थ्यलाभको कामना समेत गर्नुभयो ।

कार्यक्रममा योगी नरहरिनाथ योग तथा प्राकृतिक चिकित्सालयका अध्यक्ष कमल मल्ल, चितवन उद्योग संघका कार्यकारी निर्देशक गणेशप्रसाद सिलवाल, कोरोना संक्रमण मुक्त बिरामी लगायतको उपस्थिति रहेको थियो ।