चितवन जिल्ला दुग्ध उत्पादक सहकारी संघ भरतपुरको आयोजनामा संचालित दुईदिने सहकारी शुदृढिकरण तथा क्षमता अभिबृदी तालिम सुरु भएको छ ।
राष्ट्रिय सहकारी बैंकको प्राविधिक सहयोग र सहकारी तथा गरीबी निवारण मन्त्रालय बागमती प्रदेश, हेटौंडाको आर्थिक सहयोगमा सो कार्यक्रम संचालन भएको हो ।
चितवन जिल्ला दुग्ध उत्पादक सहकारी संघका अध्यक्ष किशोर वगालेको अध्यक्षतामा भएको कार्यक्रममा सहकारी तथा गरिवी निवारण मन्त्रालय वागमती प्रदेशका मन्त्री मधु कुमार श्रेष्ठको प्रमुख आतिथ्यता रहेको थियो ।
कार्यक्रमलाई उद्घाटन गर्नुहुँदै मन्त्री श्रेष्ठले किसानका समस्या समाधानका लागि आफ्नो प्रयास निरन्तर जारी रहेको बताउनुभयो । सरकारले सहकारी पीडितको रकम जसरीपनि फिर्ता गराउने पक्षमा रहेको बताउनुभयो ।
बास्तबिक सहकारी ठगी जोकोही भएपनि कारबाही हुनुपर्ने र पीडितले न्याय पाउनुपर्ने उहाँको भनाइ थियो ।
स्वदेशमा रोजगारी नहुँदा आम युवाहरू बिदेशीएको स्मरण गर्दै उहाँले कृषि क्षेत्रमा सुधारोन्मुख बिकास गर्नुपर्ने बताउनुभयो । उद्योगधन्दा, कलकारखाना आदिको निर्माण गर्न सकिएको खण्डमा मात्रै केही हदसम्म बिदेश पलायनको अवस्था रोकिने बताउनुभयो ।
दुग्ध किसानले अझैपनि दुधको भुक्तानी पाउन नसकेकोप्रति मन्त्री श्रेष्ठले आफू चिन्तित बनेको बताउनुभयो । देशको आर्थिक संकटलाई उकास्न कृषि पशुपालन तथा पर्यटनका क्षेत्रमा जोड दिनुपर्ने धारणा राख्नुभयो ।
कार्यक्रममा प्रदेश सहकारी विकास वोर्ड, वागमतीका उपाध्यक्ष नारायण प्रसाद देवकोटा केन्द्रीय दुग्ध सहकारी संघ लिमिटेड नेपालका उपाध्यक्ष भागीरथ तिमल्सिना जिल्ला सहकारी संघ लिमिटेड चितवनका कार्यवाहक अध्यक्ष प्रेमनाथ दुवाडी मिल्की वे कार्यक्रम प्रवन्धक डा. लेखनाथ अधिकारी लगायतका बिशिष्ट व्यक्तित्वहरुको समेत सहभागीता थियो ।
तालिममा झन्डै ५० जना भन्दा बढीको सहभागीता थियो । सहभागीहरुलाई नवकुमार अधिकारी र सम्पदा न्यौपानेले प्रशिक्षण दिनुहुनेछ ।
