अमिर रामदाम
चितवन/सरकारले आगामी आर्थिक वर्ष २०८२/०८३ को बजेटमार्फत ल्याएको २ प्रतिशत विलासिता कर र १३ प्रतिशत मूल्य अभिवृद्धि कर (भ्याट)को विरोधमा चितवनका सुनचाँदी व्यवसायीहरू आन्दोलित भएका छन्। नेपाल सुनचाँदी व्यवसायी महासंघ, नेपाल सुनचाँदी रत्न तथा आभुषण महासंघ र नेपाल हस्तकला महासंघले संयुक्त रूपमा जारी गरेको संघर्षका कार्यक्रमहरू नेपाल सुनचाँदी व्यवसायी संघ चितवनले आज दिउँसो  पत्रकार सम्मेलन आयोजना गर्दै  सार्वजनिक गरेको छ ।

संघका अनुसार चितवन जिल्लाभर जेठ २९ गते (आज) र ३० गते (भोली) पाँच सयभन्दा बढी सुनचाँदी पसलहरू पूर्णरूपमा बन्द रहनेछन् । पसल बन्दसँगै चितवनका सुनचाँदी सम्बन्धी संस्थाहरु नेपाल सुनचाँदी व्यवसायी महासंघमा आवद्ध नेपाल सुनचाँदी व्यवसायी संघ चितवन, रत्ननगर सुनचाँदी व्यवसायी संघ (नगर संघ) र नेपाल सुनचाँदी रत्न तथा आभुषण महासंघमा आवद्ध चितवन सुनचाँदी व्यवसायी संघ पूर्वी चितवनका व्यवसायीहरूको टोलीले आजै चितवका प्रमुख जिल्ला अधिकारी प्रकाश पौडेललाई ज्ञापनपत्र बुझाएका छन् ।
पत्रकार सम्मेलनमा बोल्दै नेपाल सुनचाँदी व्यवसायी संघ चितवनका अध्यक्ष हेमबहादुर विश्वकर्माले सरकारले सुन तथा हिराजडित बहुमूल्य गरगहनामा  लगाएको करले व्यवसायीलाई मात्र नभई आम उपभोक्तालाई समेत प्रत्यक्ष प्रभाव पार्ने बताउनुभयो।  सरकारको यो कर नीति अत्यन्तै अव्यवहारिक छ, यदि यो व्यवस्था लागू भएमा समग्र सुनचाँदी व्यवसायीहरूले आफ्नो पेशा व्यवसाय बन्द गर्नुपर्ने अवस्था आउने उहाँले बताउनुभयो।

नेपाल सुनचाँदी रत्न तथा आभुषण महासंघका तृतीय उपाध्यक्ष एवम् चितवन सुनचाँदी व्यवसायी संघ पूर्वी चितवनका संस्थापक अध्यक्ष प्रेम खातीले सरकारले घोषणा गरेको २ प्रतिशत विलासिता कर र १३ प्रतिशत मूल्य अभिवृद्धि कर (भ्याट) का कारण नेपाली गरगहनाहरू आम नागरिकको पहुँचबाट टाढा पुग्ने, व्यवसाय बन्द हुने र कर्मचारी एवम् कालिगढहरूको रोजगारी खोसिने सम्भावना देखिएको बताउनुभयो।

नेपाल सुनचाँदी व्यवसायी महासंघका सचिव टुलकप्रसाद विश्वकर्माले यस किसिमका मूल्य अभिवृद्धिले अवैध आयातलाई अझ धेरै प्रोत्साहन दिने बताउनुभयो। यस क्षेत्रका २५ हजार व्यवसायी र ३ लाखभन्दा बढी कालिगढ तथा मजदुरहरू र १५ लाख आश्रित व्यक्तिहरू रोजीरोटी धरापमा पर्ने निश्चित रहेको उहाँले बताउनुभयो।  नेपाल सरकारले बजेटको यो व्यवस्थाप्रति पुनर्विचार गरी २ प्रतिशत विलासिता कर र १३ प्रतिशत मूल्य अभिवृद्धि कर खारेजको लागि उहाँले माग गर्नुभयो। उहाँले महासंघहरूका चरणबद्ध आन्दोलनका कार्यक्रमहरू जानकारी गराउनुभयो।

नेपाल सुनचाँदी व्यवसायी महासंघका प्रवक्ता अधिवक्ता जीवन ज्योति विश्वकर्माले यस आन्दोलनमा कुनैपनि राजनितिक स्वार्थ नरहेको बताउनुभयो।  उहाँले यो व्यवसाय, रोजगारी र संस्कृतिको अस्तित्वको लडाई रहेको बताउनुभयो।
सामान्य दिनमा ग्रहाकहरूको भीडभाड रहने चितवन जिल्लाका व्यस्त बजारहरू नारायणगढ, भरतपुर, टाँडी, पर्सा, माडी लगायतका क्षेत्रमा आज सुनचाँदी बजार सुनसान रहेको छ । चितवन जिल्लाका पाँच सय पसलहरु बन्द हुँदा हजारौं ग्राहकहरू सेवा लिन वञ्चित भएका छन्।  आन्दोलनको सुरूको दिनमै चितवन जिल्लामा सुनचाँदी क्षेत्र पूरै ठप्प रहेको छ । पत्रकार सम्मेलनको अध्यक्षता नेपाल सुनचाँदी व्यवसायी संघ चितवनका अध्यक्ष हेमबहादुर विश्वकर्माले गरेका थिए भने संघका महासचिव गोपाल बहादुर वि.क थापा ले सहजीकरण गरेका थिए ।

प्रेस विज्ञप्तीमा उल्लेखित सुनचाँदी व्यवसायीहरूका मागहरु:-
१) हाल सबै प्रकारका सुन तथा सुनका गहनामा लागू गरिएको २ प्रतिशत विलासिता कर खारेज हुनुपर्ने ।
२) हिरा-जवाहरात जडित गहनामा लागू गरिएको मूल्य अभिवृद्धि कर (VAT) तत्काल पुनर्विचार गरी खारेज गरिनुपर्ने ।
३) सुनचाँदीको कारोवारलाई दीर्घकालीन रूपमा प्रोत्साहित गर्न चाँडोभन्दा चाँडो ऐन, नियम तथा नीतिहरू निर्माण गरिनुपर्ने ।
४) कर संरचना परिवर्तन गर्नु पूर्व मौजुदा व्यवसाय, रोजगारी तथा बजारमा पर्ने दूरगामी प्रभावहरूको विस्तृत अध्ययन गरियोस । र त्यसविना करको दायरा नबढाइनुपर्ने ।
५) छिमेकी मुलुक भारतमा सरहनै नेपालमा पनि भन्सार दर ६ प्रतिशत कायम गरिनुपर्ने ।
६) विश्व बजारको मान्यता अनुसार गुणस्तर प्रमाणिकरणको लागि अन्तर्राष्ट्रिय मान्यता प्राप्त प्रयोगशालाको व्यवस्था गरिनुपर्ने ।
७) निर्यातको ढुवानीमा २ दशमलव ५ प्रतिशत टिडिएस लाग्ने व्यवस्था खारेज गरिनुपर्ने ।