भरतपुर/चितवन बहिरा संघको आयोजनामा आयोजित २१ दिने सिपमूलक तालिम आज एक विशेष समारोहका बीच समापन गरिएको छ। कपडाको जुत्ता-चप्पल निर्माण र बेहुली सजावट विषयमा केन्द्रित उक्त तालिम वैशाख २७ गतेदेखि सुरु भएको थियो। तालिममा बहिरा तथा अपांगता भएका २० जना महिलाहरूको सक्रिय सहभागिता रहेको थियो। उनीहरूलाई आत्मनिर्भर बनाउने लक्ष्यसहित सञ्चालन गरिएको तालिममा उत्पादन र डिजाइनको सीप प्रदान गरिएको थियो। तालिमपश्चात सहभागीहरूले आफैंले तयार पारेका सामाग्रीहरूको आकर्षक प्रदर्शनीसमेत गरेका थिए।

उक्त तालिम सामाजिक विकास कार्यालय, बागमती प्रदेश (हेटौंडा) को आर्थिक सहयोगमा सम्पन्न भएको हो। समापन समारोहमा भरतपुर–९ का वडाध्यक्ष यामलाल कडेल प्रमुख आतिथ्यता रहेको थियो । उहाँले तालिममा सहभागी महिलाहरूले आर्जन गरेको सीपलाई व्यवसायमा रुपान्तरण गर्न वडाको तर्फबाट आवश्यक सहयोग प्रदान गरिने प्रतिबद्धता व्यक्त गर्नुभएको छ । उहाँले ९ नं वडाबाट तालिममा सहभागीलाई सिलाई मेसिन उपलब्ध गराउने घोषणा गर्नुभएको छ ।

तालिमकी प्रशिक्षक प्रतिज्ञा पौडेलले सबैको क्षमता एउटै नहुने भए पनि अधिकांश सहभागीहरूले तालिमबाट भरपूर लाभ लिएको उल्लेख गर्नुभयो । उहाँले यो सिपलाई घरमै बसेर सहज तरिकाले आम्दानीको माध्यम बनाउन सकिने भएकाले आत्मविश्वासका साथ अगाडि बढ्न सहभागीहरूलाई प्रेरित गर्नुभएको छ । चितवन बहिरा संघकी अध्यक्ष विष्णुकुमारी पौडेलले अपांगता भएका महिलाको जीवनस्तर उकास्न यस्ता सिपमूलक तालिमहरूको खाँचो रहेको भन्दै आगामी दिनमा अझ प्रभावकारी तालिमहरू सञ्चालन गर्ने योजना सुनााउनुभुएको छ ।