बुटवल/रुपन्देही प्रहरीले पछिल्लो समय यता सामाजिक सञ्जालको प्रयोग गरेर युवतीहरूलाई यौनजन्य क्रियाकलापमा लगाउने गरेको आरोपमा एक होटेल सञ्चालकलाई नियन्त्रणमा लिएर अनुसन्धान थालेको छ। प्रहरीका अनुसार बुटवल उपमहानगरपालिका वडा नं १३ को जितगढीमा रहेको बिवान होटलका सञ्चालक २७ वर्षीय प्रकाश न्यौपानेले ह्वाट्सपको नेटवर्क तयार गरी सम्पर्कमा आएका युवाहरूलाई युवतीहरू सम्पर्कमा ल्याएर यौनजन्य क्रियाकलापमा संलग्न गराउने गरेका थिए। उनले विभिन्न युवतीहरूका तस्बिरहरू ह्वाट्सएपको माध्यमबाट युवाहरूलाई पठाउने र युवतीहरूलाई यौनजन्य क्रियाकलापमा लगाउनका लागि दर रेट समेत कायम गर्ने गरेको पाइएको इलाका प्रहरी कार्यालय बुटवलका प्रहरी प्रमुख प्रहरी नायव उपरीक्षक इन्द्र बहादुर रानाले बताए।

हामीलाई बिवान होटलको सम्पर्क सूत्र बनाएर कलिला युवतीहरूलाई यौनजन्य क्रियाकलापमा लगाउने गरेको भन्ने सूचनाका आधारमा बुटवलको जितगढीमा रहेको बिवान होटलमा खान तलासी गर्यौं खानतलासी गर्ने क्रममा होटेल सञ्चालक न्यौपानेको मोबाइलमा केही युवतीहरूका तस्बिर समेत फेला पारेपछि नियन्त्रणमा लिएर अनुसन्धान सुरु गरेका छौँ इलाका प्रहरी प्रमुख रानाले भने।

प्रहरीका अनुसार उनको मोबाइलमा १८ देखि ३० वर्ष सम्मका युवतीहरूका तस्बिरहरू फेला परेका छन्। मोबाइलबाट उनले गर्ने गरेको सम्पर्क र ह्वाट्सएप नम्बरका आधारमा भएको नेटवर्कबारे अनुसन्धान गरी रहेको प्रहरीको भनाई छ। उनले युवतीहरूलाई यौनजन्य क्रियाकलापमा विभिन्न ठाउँमा पठाउने गरेको भन्ने सूचना छ त्यो बारे पनि बुझ्दै छौँ प्रहरी श्रोतले भन्यो।  प्रकाशले प्रयोग गर्ने ह्वाट्सप नम्बरवाट विभिन्न ठाउँबाट युवाहरूसँग सम्पर्क गर्ने गरेको तथा युवतीहरूलाई कति दिन सम्म कुन ठाउँमा लैजाने हो सो का आधारमा मूल्य कायम गरी आफैले भुक्तानी लिई युवतीहरूलाई पर-पुरुषहरूसँग पठाई यौनजन्य क्रियाकलाप गराउने जस्तो अपराध गरेको प्रहरीको भनाई छ।  मङ्गलवार साँझ पक्राउ परेका न्यौपानेलाई आज बुधवार जिल्ला अदालतबाट अनुमति लिई सामाजिक हित र नैतिकता बिरुद्धकाे अपराधमा अनुसन्धान गर्ने गरी प्रक्रिया अगाडी बढाएको जनाएको छ।