भरतपुर/औद्योगिक प्रबद्र्धनका लागि बागमती प्रदेश सरकारको आ.व.०८२/०८३ को नीति तथा कार्यक्रम र बजेट मार्फत सम्बोधन गर्नुपर्ने विषयमा माननीय उद्योग, वाणिज्य, भूमि व्यवस्था तथा प्रशासन मन्त्रीसँग छलफल कार्यक्रम सम्पन्न भएको छ ।

चितवन उद्योग संघका कार्यवाहक अध्यक्ष मदन घिमिरेले संघका महत्वपूर्ण परियोजनाहरु अन्तर्गत चितवन प्रदर्शनी केन्द्र र लघु, घरेलु तथा साना उद्योगहरुबाट उत्पादित उत्पादनहरुको बिक्री गर्ने उद्देश्य अनुरुप सञ्चालनको तयारीमा रहेको बिक्री केन्द्र लगायतका विषयमा जानकारी गराउनु भएको थियो ।

कार्यक्रममा औद्योगिक प्रबद्र्धनका लागि बागमती प्रदेश सरकारको आ.व.०८२/०८३ को नीति तथा कार्यक्रम र बजेट मार्फत सम्बोधन गर्नुपर्ने विषयहरुमा समेत छलफल गरिएको थियो ।

कार्यक्रमका विशिष्ट व्यक्तित्व उद्योग, वाणिज्य, भूमि व्यवस्था तथा प्रशासन मन्त्री सुकमाया तामाङ्गले प्रदेशकै गौरवको परियोजनाको रुपमा रहेको चितवन उद्योग संघको प्राङ्गणमा रहेको चितवन प्रदर्शनी केन्द्रलाई कुनैपनि अवस्थामा चलायमान बनाउन आफूहरु तयार रहेको बताउनुभयो । उहाँले प्रदर्शनी केन्द्रसँग सम्बन्धित व्यक्तिहरु र मन्त्रालयबीच घनीभूत छलफल गरी सञ्चालनका लागि प्रक्रिया अगाडि बढाउन छिट्टै पहल गरिने बताउनुभयो ।

छलफलमा चितवन उद्योग संघका निवर्तमान अध्यक्ष त्रिलोचन कँडेल, पूर्व अध्यक्ष हरि प्रसाद सुवेदी, उपाध्यक्ष गजेन्द्र अधिकारी लगायतले प्रदर्शनी केन्द्रसँग सम्बन्धित विषयहरुमा आफ्ना धाराणाहरु राख्नुभएको थियो ।

चितवन उद्योग संघका कार्यकारी निर्देशक गणेश प्रसाद सिलवालले सञ्चालन गर्नुभएको छलफल कार्यक्रममा चितवन उद्योग संघका कार्य वाहक अध्यक्ष मदन घिमिरे, उद्योग, वाणिज्य, भूमि व्यवस्था तथा प्रशासन मन्त्री सुकमाया तामाङ्ग, बागमती प्रदेश सभा सदस्य उत्तम जोशी, उद्योग तथा वाणिज्य कार्यालय चितवनका प्रमुख विनोद पौडेल, चितवन उद्योग संघका निवर्तमान अध्यक्ष त्रिलोचन कँडेल, पूर्व अध्यक्ष हरि प्रसाद सुवेदी, उपाध्यक्षहरु गजेन्द्र अधिकारी, प्रमेश्वर भण्डारी, युवा उद्यमी मञ्चका अध्यक्ष अश्विन गोले, पूर्व उपाध्यक्ष प्रतिभा श्रेष्ठ, संघका प्रशासकीय अधिकृत गोविन्द प्रसाद पौडेल, सञ्चार अधिकृत राजु भट्ट लगायतको उपस्थिति रहेको थियो ।