भरतपुर/भरतपुर–१०, हाकिमचोकमा रहेको चितवन मिटटाउन होटलको प्रवेशद्वार नजिक निकै भीड देखिन्थ्यो । आज बुद्ध जयन्ती भएर हो या अरु नै के कारणले भीड लागेको भनेर हेर्दा “साथ दिनुहोस्, माया बाँड्नुहोस्” भन्ने उद्देश्य बोकेर चितवन मिडटाउन होटल प्रा.लि.ले सामाजिक उत्तरदायित्व वहन गर्दै निःशुल्क कपडा घरको शुभारम्भ गरेको रहेछ ।
शुभारम्भ कार्यक्रममा चितवन मिडटाउन होटल प्रा.लि.का जुनियर कर्मचारीले कपडा आवयश्यक परेका व्यक्तिहरुलाई कपडा हस्तान्तरण गरेर कार्यक्रमको शुभारम्भ गरेका थिए । कपडा घरमा राखिएका कपडाहरुलाई आकर्षक सजावटका साथै सफा सुग्घरका साथ व्यवस्थापन गरिको छ ।
प्रयोग गर्ने अवस्थामा रहेर पनि प्रयोग बिहिन भई रहेका कपडाहरु आवश्यक पर्नेहरुका लागि उपलब्ध गर्ने माध्यमको रुपमा निःशुल्क कपडा घरको शुभारम्भ गरिएको चितवन मिडटाउन होटल प्रा.लि.का प्रबन्ध निर्देशक मदन घिमिरेले जानकारी दिनुभयो ।
घिमिरे होटलले गाँस, वास र कपडाको नारालाई केही हद भएपनि सम्बोधन गर्न सकिने हेतुले यो अभियानलाई अगाडि बढाएको बताउनुभयो । यो पहिलो अभियान भएता पनि यसलाई थप व्यवस्थापन र प्रभावकारी बनाउँदै अगाडि बढ्ने समेत घिमिरेको दावी छ ।
तपाईं, हाम्रो घरमा नलगाइएका, पुराना वा प्रयोग नभएका कपडाहरुको उचित व्यवस्थापन गर्नको लागि र आवश्यक पर्ने व्यक्ति, संघ–संस्थाहरुलाई निःशुल्क रुपमा उपलब्ध गराउनको लागि पनि निःशुल्क कपडा घर निकै उपयुक्त हुने घिमिरेले बताउनुभयो । साना कपडाले पनि ठूलो सहयोग हुन सक्ने भएकोले निःशुल्क कपडा घरमा जहाँबाट पनि कपडाहरु ल्याएर राख्न सकिने र उक्त घरबाट गरिब, असहायहरुको लागि चितवन लगायत आसपासका जिल्लाहरुमा समेत कपडा वितरण गर्ने लक्ष्य लिइएको छ ।