चितवन/राप्ती नगरपालिक वडा नम्बर १० बस्ने पूर्णीमाया चेपाङ्गलाई सोमबार गाउँमा निःशुल्क स्वास्थ्य शिविर हुँदैछ भन्ने खबर आएपछी स्वास्थ्य जाँच गराउने निधो गरिन । वडाको चौघरा कोराक स्वास्थ्य चौकीमा ग्रीन सोसाइटी नेपाल रत्ननगर–७, सौराहाको आयोजनामा भएको निःशुल्क स्वास्थ्य शिविरमा उनि सोमबार समय मै स्वास्थ्य जाँच गराउन पुगिन ।

स्वास्थ्य शिविरमा आउँदासम्म सास फेर्न धेरै असहज महसुस नभएको भएपनि जब स्वास्थ्य कर्मिले स्वास्थ्य जाँच गराउँदै गर्दा पूर्णीमायाले स्वास्थ्यमा असहज भएको महसुस गरिन् । उत्साहित हुँदै स्वास्थ्य जाँच गराउन शिविरमा पुगेकी उनलाई एक्कासी सास फेर्न गाह्रो हुन थाल्यो ।

मुटु सुन्निएर ठूलो भएको कारण उनको श्वासप्रश्वासमा संकट देखियो। तर, समयमै स्वास्थ्यकर्मी र आयोजकको तत्परताले उनको ज्यान जोगियो । भण्डारा बजारबाट तुरुन्तै अक्सिजन ल्याइयो, प्राथमिक उपचार गरियो र थप उपचारका लागि अस्पताल पठाइयो। “उहाँको अवस्था देख्दा हामीलाई पनि डर लागेको थियो, तर हामीले हिम्मत हारेनौं,” शिविर आयोजक श्रीलाल परियारले भने।

उनको जीवन रक्षाले शिविरको महत्त्व झनै उजागर गर्‍यो। “स्वास्थ्य सेवाबाट वञ्चित समुदायलाई सहयोग गर्न हामी यस्ता कार्यक्रम निरन्तर गर्छौं,” ग्रीन सोसाइटीका सदस्य पुरुषोत्तम लामिछानेले भने। एउटी वृद्धाको सास फर्काउने यो प्रयासले ग्रामीण भेगमा स्वास्थ्य सेवाको पहुँच कति जरुरी छ भन्ने कुरा प्रस्ट्याएको छ। ‘पूर्णीमायाको जीवनमा आएको यो संकट त एउटा उदाहरण मात्रै हो यस्ता समस्या भोगेर उपचार नपाएका धेरै पूर्णिमाया छन् भन्ने सहजै अनुमान लगाउन सकिन्छ’ लामिछानेले भने ।

शिविर ग्रीन सोसाइटी पब्लिक स्कूल, राप्ती नगरपालिका–१०, रत्ननगर प्याब्सन, जेसी आई खैरहनी पर्साको सह–आयोजना र शान्ति सेवा गृह काठमाडौंको प्राविधिक सहयोगमा सम्पन्न भएको थियो। यहाँ २८६ जनाले स्वास्थ्य सेवा लिए, जसमा १८९ जना वृद्धवृद्धा र अन्य उमेर समूहका तथा ९७ जना बालबालिका थिए। सुगर, प्रेसर, टिटानस भ्याक्सिन, एक्सरे, दन्त रोग, फिजियो थेरापी, रक्त परीक्षण, आँखा उपचार, चस्मा वितरण र स्त्री रोगसम्बन्धी जाँचसँगै निःशुल्क औषधि, ब्रस, मञ्जन, लिटो र झुल वितरण गरिएको संयोजक श्रीलाल परियारले बताए।