काठमाडौं/नेपाल उद्योग तथा व्यवसायी महासंघले महाधिवेशन सहित औद्योगिक प्रदर्शनीको तयारी पूरा गरेको छ ।औद्योगिक प्रवर्द्धनका लागि महासंघले पहिलो पटक औद्योगिक प्रदर्शनी सहित महाधिवेशन गर्न लागेको हो । यसको तयारी पूरा भएको महासंघका संयोजक भागिरथ सापकोटाले जानकारी दिए ।महासंघले ८ देखि ९ चैतमा तेस्रो राष्ट्रिय महाधिवेशन गर्दैछ । महाधिवेशन सहित औद्योगिक प्रदर्शनीको उद्घाटन प्रधानमन्त्री केपी शर्मा ओलीले गर्नेछन् ।
वर्तमान विषम परिस्थितिमा देशमा औद्योगिक वातावरण निर्माण गर्दै उद्योगी–व्यवसायीका हितमा काम गर्ने उद्देश्य लिएर अधिवेशन गर्न लागिएको समेत संयोजक सापकोटाले जानकारी दिए । उनका अनुसार महासंघले बबरमहलस्थित कार्की ब्यक्वेटमा देशभरिका करिब ३ हजार उद्योगी–व्यवसायीको सहभागितामा निर्वाचन सहित महाधिवेशन गर्ने भएको छ ।
महासंघले देशभित्र रहेका लघु, घरेलु, साना, मझौलादेखि ठूला उद्योगबाट उत्पादित वस्तुको बजारीकरण गर्न औद्योगिक प्रदर्शनी गर्न लागेको सापकोटाले जानकारी दिए । महासंघले अधिवेशनका अवसरमा देशभरिका उद्योगी–व्यवसायी उपस्थित गराई उनीहरूले उत्पादन गरेका वस्तु प्रदर्शनीमा राख्ने छ । साथै, उक्त स्थललाई वस्तु उत्पादक र खरिदकर्ताको जमघट स्थल बनाइने समेत उनले जानकारी दिए ।
प्रदर्शनीमा पूर्व मेचीदेखि पश्चिम महाकालीसम्मका साना–मझौला किसानदेखि ठूला उद्योगी–व्यवसायीले उत्पादन गरेका वस्तु रहने मेला उपसमितिका संयोजक गोपाल खनालले जानकारी दिए । ‘हामीले मेलामा साना, लघु, घरेलुदेखि मझौला र ठूला गरी करिब १ सय स्टल राख्दैछौं,’ उनले भने, ‘जहाँ कर्णालीमा पाइने जिम्बु, यार्चा, शिलाजितदेखि पूर्वको छुर्पी, अलैंचीदेखि चियाकफीसम्म रहने छ ।’
