भरतपुर/‘सबै महिला तथा बालिकाको लागि : अधिकार, समानता र सशक्तिकरण’ भन्ने नाराका साथ शनिबार १५औँ अन्तर्राष्ट्रिय महिला दिवस मनाइएको छ। यस अवसरमा चितवनको चित्रकथा बुटिक एण्ड ट्रेनिङ सेन्टरले ११ जना महिलालाई दक्षताको प्रमाणपत्र प्रदान गरेको छ। चित्रकथा बुटिक एण्ड ट्रेनिङ सेन्टरकी डाइरेक्टर अनिता तामाङका अनुसार संस्थाले स्थापना कालदेखि हालसम्म १०० भन्दा बढी महिलालाई सिलाई/कटाई सम्बन्धी सिप प्रदान गरेर महिलालाई आत्मनिर्भर बनाउन महत्वपूर्ण योगदान दिएको छ। ६ वर्ष देखि भरतपुर महानगरपालिका वडा नं १, हकङ बजारमा रहेको चित्रकथा बुटिक एण्ड ट्रेनिङ सेन्टरले दक्ष महिला जनशक्ति निर्माण गर्न र सलाईकटाई क्षेत्रमा रोजगारीको अवसर बढाउन काम गरिरहेको छ।
अनिता तामाङ भन्छिन,‘सिलाई/कटाई केवल कपडा जोड्ने काम मात्र नभई सिर्जनात्मक तथा व्यावसायिक सिप विकास गर्ने माध्यम पनि हो। हामीले स्थानीय महिलाहरू तथा इच्छुक महिलालाई नयाँ डिजाइन र शैलीमा तालिम दिँदै आएका छौं।’ सेन्टरले डिजाइन सम्बन्धी छोटो अवधिका कक्षाहरु क्र्यास कोर्स, एडभान्स कोर्स, डिप्लोमा कोर्स, ह्यान्ड एम्ब्रोइडरीसहित गहना बनाउने सीपमूलक कक्षाहरू सञ्चालन हुँदै आएका छन । महिलालेनै नेतृत्व गरेको यस सेन्टरबाट सिकेको सिपहरूलाई उपयोग गर्दै दिदिबैनीहरुले आम्दानीको स्रोत बढाउन सफल भएका छन् ।
चित्रकथा बुटिकले साँस्कृतिक पहिरनदेखि अन्तर्राष्ट्रिय ट्रेन्डमा चलेका सम्पूर्ण खाले पहिरनहरू तयार गर्दै आएको छ। यी कपडाहरू अष्ट्रेलिया र अमेरिकामा समेत माग हुने गरेको छ। चित्रकथा बुटिकले ‘बुटिक अफ द इयर २०१८’ र ‘पपुलर कोच बुटिक अफ द इयर २०१८’ बाट सम्मान प्राप्त गरिसकेको छ। ‘बुटिकले विभिन्न ब्युटी प्याजेन्टहरूमा उत्कृष्ट सहभागिता जनाउँदै आएको छ,’तमाङले भनिन्,‘स्थानीय सरकारसँगको सहकार्यमा तालिम पनि सञ्चालन गर्दै आएका छौँ ।’ प्रशिक्षण केन्द्रले राष्ट्रिय स्तरमा कपडा उद्योग र फेसन क्षेत्रमा नयाँ आयाम थप्ने अपेक्षा राखेको छ। महिलाहरूलाई सशक्त बनाउने उद्देश्यका साथ यो संस्था निरन्तर अग्रसर रहँदै आएको छ।
विश्वभरी विभिन्न क्षेत्रमा कार्यरत महिलाको आर्थिक, राजनीतिक र सामाजिक उपलब्धि स्मरण गर्दै महिलाको प्रविधिमा पहुँचको विस्तार गर्ने, महिला सशक्तिकरण अभिवृद्धि गर्ने, लैङ्गिक असमानता/हिंसाजन्य क्रियाकलाप निर्मूल गर्ने, महिलालाई शिक्षित र आत्मनिर्भर बनाउने एवम् उचित सम्मान गर्नेलगायतका उद्देश्य यो दिवस मनाउने गरिन्छ । सन १९७५ देखि संयुक्त राष्ट्र सङ्घले नारी दिवस मनाउन थालेको हो । पहिलो नारी दिवसको नारा ‘विगतलाई उत्सवको रूपमा मनाउने र भविष्यको योजना बनाउने’ तय गरिएको थियो । सन् १९०८ को मार्च ८ मा अमेरिकामा १५ हजार बढी महिलालले दैनिक काम गर्ने समय घटाउनुपर्ने, राम्रो तलब पाउनुपर्ने र मतदानको अधिकार दिनुपर्ने माग राख्दै प्रदर्शन गरका थिए । सोही प्रदर्शनपछि संसारभर नै महिला अधिकारको बारेमा चर्चा हुने थालेको बताइन्छ । महिला हक र अधिकारको माग सारेर महिलालले नै संघर्ष शुरु गरेको दिनको स्मरणमा यो दिवस मनाइन्छ ।