माडी/माडीको बसन्तपुरमा फागुन २२ देखि चैत २ गतेसम्म सञ्चालन हुने दोश्रो माडी साँस्कृतिक तथा पर्यटन उत्सव-२०८१ को बाल उद्यान जडान सुरु भएको छ । मेलास्थलमा जडान हुने ८ प्रकारका झुला (पिङ र अन्य खेल साधन)हरु सहितको ६ वटा ट्रक माडीको बसन्तपुर आइपुगेको हो । यसबाहेक पण्डाल सहितको स्टल निर्माण अन्तिम चरणमा पुगेको छ भने प्रचारप्रसार कार्य तीब्र पारिएको देखिन्छ ।
बसन्तपुर बजारस्थित चौरको स्तरिकरणका उद्देश्यले माडी कला केन्द्रको मुख्य आयोजना, रेडियो माडीको सह-आयोजना, माडी नगरपालिकाको प्रवर्द्धन, स्थानीय दर्जनाैं संघसंस्थाहरूको सहयोग र द लिड इन्टरटेनमेन्ट एण्ड एड्भरटाइजिङको व्यवस्थापनमा सो मेला सञ्चालन हुन लागेको हो ।
मेलामा समुद्घाटनको दिन फागुन २२ गते जनगायक जीवन शर्मा, २३ गते लोकदोहोरी गायक श्याम राना, २४ गते र्यापर मिस्टर डी, २५ गते लोकदोहोरी गायिका ज्योति मगर तथा फागुन २६ गते गायक हेमन्त शर्मा, रवि रिमाल र प्रमोद जख्मीको प्रस्तुति रहनेछ ।
त्यस्तै फागुन २७ गते गायिका अनु चौधरी, २८ गते गायक प्रकाश दुतराज, २९ गते (पहाडमा होलीका दिन) भोजपुरी डान्सर प्रिती पासवान, चैत १ गते (तराईमा होलीका दिन) नायक पल शाह र चैत २ गते शनिवार गायक खेम सेन्चुरीको प्रस्तुति रहने आयोजकले सार्वजनिक गरेको छ ।
Advertisement
