चितवन/चितवन क्षेत्र नं ३ का सांसद तथा पूर्वमन्त्री विक्रम पाण्डेले नेताहरुले देश परिवर्तन गर्न नसकेको बताउँदै अब धर्मगुरुहरुले पनि देश परिवर्तनमा ध्यान दिनुपर्ने बताउनुभएको छ। भरतपुर ४ लकुंमा आजबाट शुभारंभ भएको श्रीमद्भागवत सप्ताह ज्ञानमहायज्ञ २०८१ लाई सम्बोधन गर्दै उहाँले यस्तो बताउनुभएको  हो। उहाँले  धर्म संस्कृतिको जगेर्नामा समर्पित  भएका धर्मगुरुहरुले अब सप्ताह मात्र नभएर  नेताले गर्न नसकेको  देश विकासका कार्यमा पनि लाग्न  अनुरोध गर्नुभएको छ। पूर्वमन्त्री पाण्डेले नेपाल  धेरै सम्भावना  नै सम्भावना भएको देश भएपनि अहिले राजनीतिक मरुभूमि बनेको बताउनुभयो।

उहाँले भन्नुभयो ” हाम्रो देश सम्भावना नै सम्भावना भएको देश हो।  यहाँ  जे पनि फल्छ तर पछिल्लो समय देश राजनीतिक मरुभूमि भएको छ। ” उहाँले देशलाई ऋषिमुनिहरुको  तपोभूमि भएको पनि बताउनुभएको छ।  उहाँले  धर्म संस्कृतिको जगेर्ना गर्न यस्ता धार्मिक कार्यहरु गरिरहनुपर्ने बताउँदै  महायज्ञको सफलताको कामना गर्नुभएको छ।