माडी/माडी नगरपालिकाको स्वामित्वमा रही माडी नगरपालिका वडा नं. ५ मा निर्माण भई प्रयोगविहिन अवस्थामा रहेको ३ कोठे भवनलाई “कोशेली घर” को रुपमा सञ्चालन गर्ने उद्देश्य अनुरुप २०८० माघ ०३ गतेदेखि १५ वर्षको लागि माडी नगरपालिकाले चितवन उद्योग संघ, माडी समितिलाई हस्तान्तरण गरेको थियो ।
क्षेत्रका उद्यमीहरुबाट उत्पादित वस्तु तथा सेवाको बिक्री वितरण, प्रदर्शन गर्नका लागि “कोशेली घर” मार्फत प्रबद्र्धन गर्ने उद्देश्य अनुरुप हस्तान्तरण भएको उक्त कोशेली घरको आज एक विशेष कार्यक्रमका बीच माडी नगरपालिकाकी नगरप्रमुख तारा कुमारी काजी महतोले उद्घाटन गर्नुभयो ।
चितवन उद्योग संघ माडी समितिका उपाध्यक्ष नारायणदत्त रिजालले स्वागत मन्तव्य राख्नुभएको कार्यक्रममा प्रमुख अतिथि माडी नगरपालिकाकी नगरप्रमुख तारा कुमारी काजी महतोले माडीमा उत्पादन भएका वस्तुहरुको एकै थलोबाट बिक्री वितरण गर्ने कोशेली घरले पक्कै पनि माडी भ्रमणमा आउने पर्यटकहरुलाई माडीका उत्पादनको जानकारी गराई माडीको आयआर्जनमा समेत टेवा पु¥याउन ठूलो मद्दत पुग्ने बताउनुभयो ।

उहाँले कोशेली घरमा माडी क्षेत्रका सम्पूर्ण उद्योगहरुको पहिचान खुल्ने गरी विवरण तयार गरी “कोशेली घर” मा नमूना प्रदर्शन गर्न, माडी क्षेत्रको पर्यटन, प्रबद्र्धनका लागि माडी क्षेत्रको पर्यटनसँग सम्बन्धित वस्तु तथा स्थानको पहिचान झल्कने गरी “कोशेली घर” मा प्रदर्शन गरी सञ्चालन गर्न समेत आग्रह गर्नुभयो ।
त्यस्तै कार्यक्रमका विशिष्ट अतिथि चितवन उद्योग संघका उपाध्यक्ष तारा बहादुर कार्कीले कोशेली घरको माध्यमबाट उद्योगीहरुका आफ्ना उत्पादनको बजारीकरण गर्नमा सहयोग पुग्ने बताउनुभयो । त्यस्तै कार्यक्रमका अर्का विशिष्ट अतिथि चितवन उद्योग संघ माडी समितिका निवर्तमान अध्यक्ष भोजराज खनालले कोशेलीको सञ्चालन प्रक्रिया र कोशेली माडी क्षेत्रका विभिन्न उद्योगहरुबाट राखिएका उत्पादन सामाग्रीहरुको बारेमा जानकारी गराउनु भएको थियो ।
चितवन उद्योग संघ माडी समितिका सचिव जिताराम महतोले सञ्चालन गर्नुभएको कोशेली घर उद्घाटन कार्यक्रमलाई चितवन उद्योग संघ माडी समितिका अध्यक्ष रमेश नेपालीले धन्यवाद मन्तव्य सहित समापन गर्नुभएको थियो ।