भरतपुर/चितवन उद्योग संघ, महिला उद्यमी मञ्चले मञ्चका पूर्व अध्यक्षहरुलाई सम्मान तथा माया छात्रावासमा आश्रित विद्यार्थीहरुको लागि खाद्यान्न सामाग्री वितरण लगायतका कार्यक्रमहरु गरी ३३ औं स्थापना दिवस मनाएको छ ।
चितवन उद्योग संघ, महिला उद्यमी मञ्चकी अध्यक्ष सृजना सोतीको अध्यक्षतामा सम्पन्न कार्यक्रममा चितवन उद्योग संघका कार्यवहाक अध्यक्ष मदन घिमिरे प्रमुख अतिथि रहनुभएको थियो ।
प्रमुख अतिथि घिमिरेले ३३ औं स्थापना दिवसको सफलताको शुभकामना व्यक्त गर्नुभयो । घिमिरेले चितवन उद्योग संघको स्थापनाकालदेखि नै महिला उद्यमी समितिले उद्योगको प्रबद्र्धनात्मक कार्यहरुमा महत्वपूर्ण भूमिका खेल्दै हालसम्म पनि उत्तिकै सक्रिय रुपमा संगठित हुँदै गएकोमा खुशी व्यक्त गर्नुभयो ।
चितवन उद्योग संघ, महिला उद्यमी मञ्चकी उपाध्यक्ष कविता श्रेष्ठले स्वागत मन्तव्य राख्नुभएको कार्यक्रममा चितवन उद्योग संघ, पूर्व अध्यक्ष मण्डलका अध्यक्ष त्रिलोचन कँडेल, बागमती प्रदेश उद्योग परिसंघ, महिला उद्यमी मञ्चकी अध्यक्ष चन्दना कोइराला, चितवन उद्योग संघ, महिला उद्यमी मञ्चका पूर्व अध्यक्षहरु सरिता पौडेल, पवित्रा जोशीले शुभकामना मन्तव्य सहित आफ्नो कार्यकालमा भएका अनुभवहरु सुनाउनु भएको थियो ।

३३ औं स्थापना दिवसको अवसरमा २०४७ सालदेखि हालसम्म पूर्व अध्यक्षको भूमिकामा रही गर्नुभएको योगदानको उच्च सम्मान गर्दै चितवन उद्योग संघ, महिला उद्यमी मञ्चका पूर्व अध्यक्षहरु सरिता पौडेल, पवित्रा जोशी, तारादेवी काफ्ले, पार्वती कँडेल, सुधा सुवेदी पौडेललाई सम्मान समेत गरिएको थियो ।
कार्यक्रममा उद्योग संघका पालिका समितिका अध्यक्ष तथा पदाधिकारीहरु, महिला उद्यमी मन्च, युवा उद्यमी मन्चका पदाधिकारी तथा सदस्यहरु उद्योग संघका पूर्व पदाधिकारी तथा सदस्यहरू लगायतका उद्योगीहरुको सहभागिता रहेको थियो ।
चितवन उद्योग संघ, महिला उद्यमी मञ्चकी सचिव गीता पौडेलले सञ्चालन गर्नुभएको कार्यक्रमलाई चितवन उद्योग संघ, महिला उद्यमी मञ्चकी अध्यक्ष सृजना सोतीले धन्यवाद मन्तव्य सहित कार्यक्रम समापन गर्नुभएको थियो ।
यसैबीच मञ्चको ३३ औं स्थापना दिवसको अवसरमा भरतपुर महानगरपालिका वडा नं. १२ स्थित जनजाति कल्याण आश्रम आमाको माया छात्रावासमा आश्रित विद्यार्थीहरुको लागि खाद्यान्न सामाग्री वितरण गरिएको थियो । मञ्चकी अध्यक्ष सृजना सोतीको नेतृत्वमा पुगेको टोलीले छात्रावासकी संस्थापक अध्यक्ष कृष्ण कुमारी गिरीलाई एक कार्यक्रमका बीच सामाग्री हस्तान्तरण गर्नुभएको थियो ।