काठमाडौं/बालकुमारी स्थित एउटा घरमा गयरातिको मध्यरातमा विद्युत् चुहावट भएर आगलागी हुंदा ४ वटा पसल जलेर नष्ट भएको छ । महानगरीय प्रहरी प्रभाग कोटेश्वरका अनुसार बालकुमारी स्थित सि.सि.आर.सी.कलेज नजिक स्वाभिमान श्रेष्ठको दुई तले घरमा एक्कासी विद्युत् चुहावट भएर आगलागी भएको थियो । सो आगलागी बाट घरको पहिलो तलामा भोजराज भट्टले सञ्चालन गरेको ‘डगेरा फार्मेसी’ जलेर नष्ट भएको महानगरीय प्रहरी प्रभागले जनाएको छ ।
साथै सोही आगलागीबाट श्रेष्ठको घर सँगै एउटा पान पसल र मःम पसल जलेर नष्ट भएको प्रहरीले जनाएको छ । सँगै को ‘जुम्बा डान्स सेन्टर’ पनि जलेर नष्ट भएको छ । आगलागीबाट भएको अन्य क्षतिको विवरण भने यकिन नभएको प्रहरीले जनाएको छ । महानगरका पाँच वटा दमकलको सहयोगमा करिव एक घण्टा पछि आगो नियन्त्रणमा आएको थियो । आगो निभाउन काठमाडौंका तीन र ललितपुरका दुई वटा दमकलका साथै प्रहरी परिचालन गरिएको थियो ।
