काठमाडौँ/नेकपा माओवादी केन्द्रले विधानलाई लिपिबद्ध गर्न वरिष्ठ उपाध्यक्ष नारायणकाजी श्रेष्ठको नेतृत्वमा चार सदस्यीय कार्यदल गठन गरेको छ । मंगलबार अध्यक्ष पुष्पकमल दाहाल ‘प्रचण्ड’ निवास खुमलटारमा बसेको पदाधिकारी बैठकले विधानलाई लिपिबद्ध गर्न र पालिका सम्मेलनको कार्यविधि बनाउन छुट्टाछुट्टै कार्यदल गठन गरेको हो ।
जसमा महासचिव देव गुरुङ, उपमहासचिवद्वय वर्षमान पुन र जनार्दन शर्मा रहेका छन् । यता पालिका सम्मेलन गर्दा आउने प्रतिनिधिहरू पार्टी सदस्यको आधारमा कसरी आउने र निर्वाचन प्रक्रिया कस्तो बनाउने भन्ने विषयमा कार्यविधि बनाउन अर्को समिति बनेको सचिव चक्रपाणि खनालले रातोपाटीलाई बताए । अर्को कार्यदलमा महासचिव देव गुरुङ, उपमहासचिव वर्षमान पुन र सचिव हितराज पाण्डे रहेको उनले जानकारी दिए ।
यसअघि कात्तिक २६ गते बसेको बैठकले विधानमा देखिएका अस्पष्टता हल गर्नका लागि अध्यक्ष पुष्पकमल दाहाल प्रचण्डले नेताहरूलाई तीन दिनको समय दिएका थिए ।
‘मुख्यतः विधान र उपनिर्वाचनको सम्बन्धमा छलफल भयो । गतवर्ष फागुनमा विधान अनुमोदन भएको थियो । हलमा पेस गर्दा जेजति टिप्पणी आए त्यसमा अध्यक्षले जवाफ दिनेबेला विधानमा हटाउने र राख्ने सम्बन्धमा प्रतिबद्धता जनाउनुभएको थियो । त्यही कुरालाई लिपिबद्ध गर्न कार्यदल गठन गरेको हो’, सचिव खनालले भने ।
कार्यदलको दिएको सुझावका आधारमा विधान अनुमोदन गरी निर्वाचन आयोगमा पठाउने निर्णय भएको उनले बताए । आयोगमा पठाउँदा तीन महले बनाएर पठाउनुपर्ने भएको हुनाले विधानमाथि थप छलफल भएको खनालको भनाइ छ । यद्यपि विधान अधिवेशनको हलले गरेको निर्णय तलमाथि नहुने उनले बताए । गत वर्ष फागुन १ देखि ३ गतेसम्म काठमाडौँमा माओवादीको प्रथम विधान अधिवेशन भएको थियो ।
