भरतपुर/विश्वभर महामारीको रुपमा फैलिई रहेको कोरोना भाइरस (कोभिड–१९) संक्रमण रोकथामका लागि नेपाल सरकारले दशैभरी लागू हुने गरी गरेको लकडाउन खुलेको अवस्था भएता पनि संक्रमणको जोखिम रहिरहेको र भरतपुर महानगरपालिकाभित्र कोरोना संक्रमितहरुको संख्या बढिरहेको सन्दर्भमा सम्भावित जोखिमलाई मध्यनजर गर्दै भरतपुर महानगरपालिका कार्यालय, जिल्ला प्रशासन कार्यालय चितवन, जिल्ला प्रहरी कार्यालय चितवन र नीजि क्षेत्रको संयुक्त विशेष बैठकको निर्णय अनुसार भरतपुर महानगरपालिका क्षेत्रभित्र २०७७ श्रावण ३० गते राती १२ः०० बजेदेखि लागू हुने गरी एकहप्ताका लागि निषेधाज्ञा सहित लकडाउन गर्न लागिएको हो ।
शुक्रबार महानगरपालिकामा भएको छलफलमा भरतपुर महानगरपालिकाकी मेयर रेनु दाहाल, प्रमुख जिल्ला अधिकारी नारायणप्रसाद भट्टराई, जिल्ला प्रहरी प्रमुख नान्तीराज गुरूङ, चितवन उद्योग संघका अध्यक्ष राजु पौडेल, उद्योग वाणिज्य संघ, यातायात व्यवसायी लगायत सरोकारवाला निकायका प्रमुखहरु लगायतको सहभागिता रहेको थियो ।
निषेधाज्ञा जारी भएसँगै महानगर क्षेत्रभित्र सार्वजनिक यातायात पूर्णरूपमा ठप्प हुनेछ भने उद्योग तथा कलकारखानाहरू सञ्चालनमा समेत कडाई गरिने, कलकारखाना सञ्चालनको लागि कारखानाभित्रै बस्नेहरूबाट मात्रै सञ्चालन गर्न पाइने बैठकमा सहभागी चितवन उद्योग संघका अध्यक्ष राजु पौडेलले जानकारी दिनुभयो । निषेधाज्ञा अवधिभर अत्यावश्यक सेवा जस्तै दमकल, एम्बुलेन्सहरु समेत पूर्ण स्वास्थ्य सावाधानी अपनाएर मात्रै सञ्चालन गर्न पाइने, निषेधाज्ञा उल्लंघन गरेको पाइएमा कडा कारवाही गरिने चितवनका प्रमुख जिल्ला अधिकारी नारायणप्रसाद भट्टराईले जानकारी दिनुभयो ।
महानगरपालिका भित्र हालसम्म ९३ जनामा कोरोना भाइरस संक्रमण पुष्टि भएको छ । जसमध्ये पुरूष ७०, महिला २३ रहेका छन् । एक जनाको मृत्यु भएको छ । महानगरभित्र पछिल्लो ३ दिनमा २३ जना संक्रमित थपिएका छन् ।
