भरतपुर/चितवनको उद्योगी व्यवसायीहरुको छाता संस्था उद्योग वाणिज्य संघ चितवनको आयोजना एवम् चनौली बजार व्यवस्थापन समितिको सह आयोजनामा आज पश्चिम चितवनका व्यवसायीहरूलाई लक्षित गरी करदाता शिक्षा कार्यक्रम सम्पन्न भएको छ । कार्यक्रम पश्चिम चितवनको चनौली बजार स्थित चनौली पाटी प्यालेसमा भएको हो । पश्चिम चितवनका उद्योगी व्यवसायीहरुलाई आय कर तथा मूल्य अभिवृद्धि कर लगायत करका नीति नियमका बारेमा जानकारी गराउने उद्देश्यले कार्यक्रम आयोजना गरिएको थियो ।

कार्यक्रममा स्वागत मन्तव्य व्यक्त गर्दै उद्योग वाणिज्य संघ–चितवनका अध्यक्ष सुमनकुमार श्रेष्ठले करको न्युनतम जानकारी व्यवसायीहरुमा नहुँदा करसम्बद्ध झन्झटहरु जस्तै मिसम्याचमा पर्ने, ननफाईलर रहने, कर चुक्ता लिने, आय विवरण बुझाउने जस्ता विषयमा समस्याहरु भोगेको हुनाले ति समस्याहरु निराकरण गर्ने उद्देश्यका साथ कार्यक्रमको आयोजना गरिएको बताउनुभयो । उहाँले  व्यवसायीहरूलाई अन्य कुनै तालिम आवश्यक परे तालिम दिन उद्योग वाणिज्य संघ–चितवन सधै तयार रहेको बताउनुभयो ।
कार्यक्रमका आन्तरिक राजश्व कार्यालय भरतपुरका प्रमुख कर अधिकृत एवम कार्यक्रमका प्रमुख अतिथि पुण्य विक्रम खड्काले करदाता भनेको राज्यको रक्तसञ्चार भएको बताउँदै देश विकासका लागि सरकार मात्र केही होइन हाम्रो पनि भूमिका ठुलो हुन्छ भन्ने सोचेर कर कर तिर्न व्यवसायीहरूलाई आग्रह गर्नुभयो । उहाँले व्यवसायीहरुले आय व्यय वुझाउने क्रममा लेखा राख्दाका त्रुटि लगाएतका कारणले करको भार बढी भएको बताउँदै एक महिना भित्र आय व्ययमा भएको त्रुटि सच्याउन मिल्ने बताउनु भएको थियो । उहाँले करमा बजारमा आएको समस्याका विषयलाई ध्यानमा राखेर सिकाउनु पर्ने बताउँदै कार्यक्रमको  सफलताको शुभकामना व्यक्त गर्दै संघ सँग सहकार्य गरि अगाडि बढ्ने बताउनु भयो ।
कार्यक्रममा बोल्दै उद्योग वाणिज्य संघ–चितवनका वरिष्ठ उपाध्यक्ष चिरञ्जीवी सुवेदीले व्यवसाय गर्दा व्यवसायीहरूले करका बारेमा जानेको छैन भनेर छुट नहुने भएकाले सवैले जान्नुपर्ने भएकाले ध्यान दिएर नजानेका कुरा निर्धक्क सँग प्रशिक्षक सँग सोध्न व्यवसायीलाई अनुरोध गर्नुभयो ।
कार्यक्रममा नेपाल रेडक्रस सोसाइटी चनौली उपशाखाका अध्यक्ष ओम लामिछानेले करका नीति नियमका बारेमा जानकारी बिना व्यवसायिक सफलता प्राप्त गर्न नसकिने भएकाले नीति नियमका बारेमा सिक्न व्यवसायीहरूलाई आग्रह गर्नुभयो ।
करदाता शिक्षा एवम् प्रक्षिण कार्यक्रममा उद्योग वाणिज्य संघ–चितवनका राजश्व सल्लाहकार सिए विमान कार्की, सिए सुजिता अधिकारी र आन्तरिक राजश्व कार्यालयको कर अधिकृत विमल पौडेलले कार्यक्रमको मध्यस्तकर्ता रहनु भएको थियो ।
कार्यक्रममा उद्योग वाणिज्य संघ चितवनका उपाध्यक्ष त्रय राजेन्द्र ओली, अशोक अधिकारी, नारायण प्रधान, तालिक संयोजक सुनिता लिगल कर्माचार्य, कार्यकारी निर्देशक निल के.सी, निर्माण सामाग्र हार्डवयेर व्यवसायी संघका अध्यक्ष नरहरी घिमिरे, वरिष्ठ उपाध्यक्ष अर्जुन लामिछाने लगायत चनौली बजार व्यवस्थापन समितिका पदाधिकारी, कार्यसमिति, पश्चिम चितवनका विभिन्न बजार व्यवस्थापन समितिका अध्यक्ष एवम् प्रतिनिधि, उद्योग वाणिज्य संघ चितवनका कर्मचारी सहित पश्चिम चितवनका उद्योगी व्यवसायी गरी १०० जना भन्दा बढिको सहभागिता रहेको थियो ।
उद्योग वाणिज्य संघ–चितवनका अध्यक्ष सुमानकुमार श्रेष्ठको अध्यक्षता एवम् चनौली बजार व्यवस्थापन समितिका अध्यक्ष हुमनाथ ढकालले धन्यवाद ज्ञापन सहित समापन गर्नुभएको कार्यक्रम संघका कार्यक्रम अधिकृत गणेश सुवेदीले सञ्चालन गर्नुभएको थियो । उद्योग वाणिज्य संघ चितवनले यस बर्ष चितवन जिल्लका विभिन्न स्थानहरुमा निरन्तर रुपमा कर सचेतना तथा कर शिक्षा लगायतका कार्यक्रमहरु आयोजना गर्दै आइरहेको छ ।