चितवन/श्रीकृष्ण प्रणामी युवा परिषद जिल्ला कार्यसमिति चितवनले आज एक कार्यक्रमकाबीच पशु बली निषेध तथा शाकाहारी सचेतना अभियान संचालन गरेको छ । आज दिउँसो भरतपुरको चौबीस कोठीमा सो अभियान संचालन भएको थियो । श्रीकृष्ण प्रणामी युवा परिषद जिल्ला कार्यसमिति चितवनका अध्यक्ष श्याम पोख्रेलको अध्यक्षतामा भएको कार्यक्रममा परिषद केन्द्रीय अध्यक्ष जगदीशचन्द्र शर्माको प्रमुख आतिथ्यता रहेको थियो । कार्यक्रममा बोल्नुहुँदै शर्माले धर्मका नाममा जथाभावी पशुबली दिनु गलत भएको बताउनुभयो । हाम्रो मिलेर बसेको समाजलाई पशुबली दिने प्रवृत्तिले धार्मिक सद्भाव भड्काएको तर्क गर्नुभयो ।
ब्रम्हाकुमारी राजयोग सेवा केन्द्र, वैष्णब परिषद, एनिमल नेपाल, चितवन एनिमल सेभ र आर्ट अफ लिभिङको सहकार्यमा उक्त कार्यक्रम संचालन भएको हो । चाडबाडका नाममा जथाभावी पशुबली गर्न नहुने, धार्मिक सद्भाव कायम गराउन जोड दिनुपर्ने, धार्मिक एकता नै आजको युगमा अपरिहार्य भएकाले समाजलाई सुसूचित गराउन जोड दिनुपर्ने जस्ता विषय अभियानमा समेटिएको कार्यक्रम संयोजक इश्वरचन्द्र पौड्यालले जानकारी दिनुभयो । चौबीस कोठीमा कोणसभाद्वारा गरिएको उक्त अभियानमा विभिन्न हिन्दुधर्मका अनुयायीहरुको उपस्थिति रहेको थियो ।
