चितवन/नेपाल दुर्लभ रक्तसमुदाय, चितवनको आयोजनामा असोज ३ र ४ गते नेगेटिभ रगतको रक्तदाताहरुको बृहत राष्ट्रिय भेला तथा रक्तदाता सचेतना कार्यक्रम साथै प्रथम केन्द्रिय महाअधिवेशन गर्ने भएको छ ।
संस्थाको भरतपुरमा सम्पन्न पत्रकार सम्मेलनमा कार्यक्रमको बारेमा जानकारी गराईएको छ । संस्थाका अध्यक्ष लक्ष्मण ज्ञवालीले संस्थाले विभिन्न जिल्लाका जिल्ला संयोजक र प्रतिनिधिहरुको उपस्तिथिमा असोज ३ गते नेगेटिभ रगत हुने रक्तदाता बीचमा दुर्लभ रगत र यसको व्यवस्थापन कसरी गर्ने भन्ने बिषयमा अन्तर्कृया गर्नुका साथै रमाइलो खेल कार्यक्रम गर्ने र असोज ४ गते विभिन्न जिल्लाका प्रतिनिधिहरुको उपस्थितिमा प्रथम केन्द्रीय महाधिवेशन गर्ने बताउनुभयो ।
पत्रकार सम्मेलनमा संस्थाका उपाध्यक्ष अरुण बहादुर रानाभाटले चितवनमा हुने कार्यक्रमलाई सफल बनाउन विभिन्न उपसमितिहरु तयार गरी अगाडि बढ्ने बताउनुभयो । त्यस्तै संस्थाका सचिव राजमणी नेपालले नेगेटिभ ब्लड गु्रप हुने साथीहरुले आ आफ्नो सम्पर्कमा रहेका साथीहरुलाई जानकारी गराएर कार्यक्रममा उपस्थित भईदिन सम्पूर्ण आग्रह समेत गर्नुभयो । २०५८ सालमा स्थापना भएको नेपाल दुर्लभ रक्त समुदायले हालसम्म देश भरी नै नेगेटिभ रगत व्यवस्थापनमा महत्त्वपूर्ण योगदान पुर्याउदै आएको छ।