माडी/जनघनत्व र भौगोलिक दिष्टिकोणका हिसाबले समेत बिकट माडीको पूर्वी बगही विभिन्न पूर्वाधारको अभावमा पछाडि परेको छ । माडीको एकमात्र र पुरानो बसपार्कको रूपमा रहेको बगही बसपार्क  कच्चीसंगै वर्षातको समयमा दुर्गन्धित बनेको हो । ठोरी नाका नजिकै पर्ने उक्त बसपार्क दिनमा साना तथा ठूलागरी झन्डै ७०० भन्दा बढी सवारीसाधन आवतजावत गर्ने गर्छन् ।

प्रयाप्त शौचालयको अभावमा यात्रुहरुलाई दिसापिसाबका लागि समस्या भएको स्थानीय गंगाबहादुर अधिकारीले जानकारी दिनुभयो । प्रत्येक बर्ष नगरले छुट्टाउने बजेटमा समेत उक्त बसपार्कको स्तरोन्नतिका लागि नसमेटिएको अधिकारीले दुखेसो पोख्नुभयो । अधिकांश दुराहरुको बसोबास रहेको त्यस क्षेत्रमा बाहुन, क्षत्री, गुरुङ, मगर, राई, लिम्बू, नेवार, चेपाङ र प्रजा आदि जातिको बाहुल्यता छ ।

उता, माडी ९ का वडाध्यक्ष घनश्याम दवाडीले प्रत्येक बर्ष वडाले बसपार्क स्तरोन्नतिका लागि भन्दै १० लाख रुपैयाँ छुट्टाउदै आएको भएपनि वर्षातको समयमा खोला व्यवस्थित नहुँदा बजेट बालुवामा पानी हालेझै भएको बताउनुभयो । कालिका एफएमसंग संक्षिप्त कुराकानी गर्नुहुँदै उहाँले बसपार्क नजिकैको खोलामा व्यवस्थित करिडोर र तटबन्धनको व्यवस्था हुन नसकेको बताउनुभएको हो । आगामी बर्षभित्र ब्यबस्थित बसपार्क निर्माणको कार्यलाई सम्पन्न गर्नेगरी योजना अगाडि बढाइएको दवाडीले जानकारी दिनुभयो ।