भरतपुर/चितवन उद्योग संघ, महिला उद्यमी मञ्चको आयोजनामा दोश्रो तीज विशेष उद्यमशिल एक्स्पो तथा व्यापार मेला–२०८१ को तयारी सम्बन्धमा भरतपुर महानगरपालिकाका वडाअध्यक्षहरुसँग छलफल कार्यक्रम सम्पन्न भयो । चितवन उद्योग संघ, महिला उद्यमी मञ्चकी अध्यक्ष सृजना सोतीको अध्यक्षतामा सम्पन्न कार्यक्रममा चितवन उद्योग संघका अध्यक्ष सूर्य प्रसाद न्यौपानेले स्वागत मन्तव्य राख्नुभएको थियो । कार्यक्रममा भरतपुर महानगरपालिका वडा नं. ५ का वडाअध्यक्ष युद्ध प्रसाद श्रेष्ठ, महानगरपालिका वडा नं. १० का वडाअध्यक्ष प्रमेश्वर खनाल, भरतपुर महानगरपालिका वडा नं. १२ का वडाअध्यक्ष लेखराज पन्त (हरि), भरतपुर महानगरपालिका वडा नं. १ का वडा सदस्य राममाया पिया, भरतपुर महानगरपालिका वडा नं. ७ का वडा सदस्य अमृता गौतम, भरतपुर महानगरपालिका वडा नं. ९ का वडा सदस्य सूर्य प्रसाद खनाल, भरतपुर महानगरपालिका वडा नं. २९ का वडा सदस्य नरमाया वि.क.अधिकारी, नेपाल उद्योग परिसंघ, बागमती प्रदेश महिला उद्यमी मञ्चकी अध्यक्ष चन्दना कोइराला लगायतले आ–आफ्ना भनाई राख्नुभएको थियो ।

बोल्ने क्रममा अधिकांश वक्ताहरुले तीज मेलामा आ–आफ्ना वडाहरुमा महिलाहरुलाई प्रदान गरिएका तालिमबाट उत्पादन भएका वस्तुहरुलाई मेलाका माध्यमबाट बजारीकरणको लागि वडाको सहयोगमा मेलामा सहभागिता गराउने प्रतिवद्धता समेत व्यक्त गरेका थिए । त्यस्तै आफ्ना वडाभित्रका टोल सुधार समितिहरुमा आवद्ध महिला उद्यमीलाई सहभागिताको लागि सूचना सम्प्रेषणका लागि पहल गर्ने बताएका थिए ।