चितवन/कालिका एफएम तथा कालिका एचडीले आयोजना गरेको दश दिने क्षमता विकास तथा उद्घोषण कला तालिम सकिएको छ । बिहीबार औपचारिकरूपमा समापन गरिएको हो । बिहान र दिउँसो गरी दुई समूहमा विभाजन गरी सञ्चालन गरिएको तालिममा १६ जना प्रशिक्षार्थी सहभागी थिए । समापन समारोहका क्रममा कालिका एफएमका निर्देशक दीपक पौडेलले प्रशिक्षार्थीहरूको चाहनाअनुसार विगत लामो समयदेखि नै क्षमता विकास तथा उद्घोषण तालिमलाई निरन्तरता दिँदै आएको बताए । आगामी दिनमा पनि आवश्यकताअनुसारका तालिम आयोजना गर्दै जाने उनले बताए ।

कार्यक्रमका प्रमुख अतिथि एवम् कम्प्युटर एसोसिएसन नेपाल (क्यान) महासंघ चितवन शाखाका अध्यक्ष टेकलाल भुसालले एक पटक सिकेको सीपलाई व्यवहारमा लागू गर्दै जाने हो भने सीपको सही सदुपयोग हुने बताए । दश दिनसम्म पाएको सैद्धान्तिक एवम् प्रयोगात्मक ज्ञानलाई अभ्यासमार्फत थप निखारता ल्याउन आवश्यक रहेको सुझाव दिए । ज्ञानज्योति पुस्तकालय धर्मचोकका सचिव विनोद अनुजले भने धेरै मानिसमा बोल्ने कलाको अभ्यास नहुँदा समाजमा आफ्ना धारणासमेत खुलेर राख्न नसक्ने समस्या समाधानको लागि यस्ता खालका तालिमले विशेष भूमिका खेल्ने बताए । प्रशिक्षकमार्फत पाएको सीप तथा ज्ञानलाई व्यवहारमा उतार्ने जिम्मा स्वयम् प्रशिक्षार्थीकै भएको हुँदा आगामी दिनको यात्रा आफैँमा निर्भर रहने बताए ।

तालिमका प्रशिक्षक तुलमान गुरूङले दश दिनसम्म सिकेका सीप पूर्ण नहुने हुँदा यसलाई थप परिष्कृत गराउनको लागि आफैँले प्रयास गर्नुपर्ने बताए । समापन कार्यक्रममा प्रशिक्षार्थीहरूले पनि दश दिनसम्म सिकेका सीप र क्षमता विकासको अनुभव सुनाएका थिए । प्रशिक्षार्थी विष्णुराज पौडेलले सञ्चालन गरेको कार्यक्रममा प्रशिक्षार्थी सुवास अधिकारीले स्वागत मन्तव्य दिएका थिए । कार्यक्रम प्रशिक्षार्थी रक्षा पाण्डेको अध्यक्षतामा सम्पन्न भएको हो । प्रशिक्षार्थीहरूमा थप निखारता ल्याउनको लागि पनि कार्यक्रम सञ्चालन, अध्यक्षता तथा स्वागत मन्तव्यसहित शुभकामना मन्तव्यमा सहभागी गराइएको हो ।