चितवन/विश्व हिन्दु युवा संघ जिल्ला कार्यसमिति चितवनले आज एक कार्यक्रमकाबीच जिल्ला प्रशासन कार्यालय चितवनका प्रमुख जिल्ला अधिकारी इन्द्रदेव यादव समक्ष ज्ञापन पत्र बुझाएको छ । विश्व हिन्दु महासंघका अध्यक्ष प्रेमप्रसाद गैरे र विश्व हिन्दु युवा संघ चितवनका अध्यक्ष घनश्याम पौडेल श्यामको संयोजकत्वमा जिल्ला प्रशासन कार्यालयको ध्यानाकर्षण गराएको हो ।
उक्त ज्ञापन पत्रमा यसअघि नारायणी कला मन्दिरमा हुँदै आएको सच्चाई नामक इसाई संस्थाले संचालन गरिरहेको धर्मान्तरणको गतिविधि तत्काल रोक्न बिश्व हिन्दु समितिले आह्वान गरेको हो । १५ दिनभित्र विभिन्न प्रकारका गतिविधि बन्द नगरे वैदिक हिन्दु सनातन धर्मसंग सम्बन्धित संघ संस्थाहरु चरणबद्द आन्दोलनमा उत्रने बिश्व हिन्दु युवा संघका अध्यक्ष घनश्याम पौडेल श्यामले जानकारी दिनुभयो ।
भरतपुरको चौविसकोठीदेखि जिल्ला प्रशासन कार्यालयसम्म शङ्खध्वनि सहित भव्य मोटरसाइकल र्याली गरिएको थियो । समितिले यसअघिपनि विभिन्न मागहरु राखेर जिल्ला प्रशासन कार्यालयमा ध्यानाकर्षण गराउदै आइरहेको थियो ।
