माडी/माडी नगरपालिका वडा नम्बर ८ दक्षिण अयोध्यापुरीकि एक क्यान्सर पिडित समृद्धि अधिकारीको उपचारको लागि भरतपुर–७, कृष्णपुर निवासी केशरकुमारी भट्टराईको परिवारले आर्थिक सहयोग गरेको छ । माडीमा दिलीपको छिमेकी समेत रहेका भट्टराई परिवारले बालिकाको उपचारमा थोरै भए पनि सहयोग पुराउने लक्ष्यसहित रु. ५० हजार सहयोग गरिएको केशरकुमारीका जेठा छोरा दुर्गा भट्टराईले जानकारी दिनुभयो ।
उहाँले अस्ट्रेलियामा रहेका भाइहरु विक्रम, धर्म, धनराजसँगको सहकार्यमा परिवारको तर्फबाट रकम सहयोग गरेको बताउनुभयो । करिव ५ महिना अगाडी बालिका बिरामी भइ भरतपुरका विभिन्न अस्पतालमा परिक्षण गर्दै जाँदा रगतको क्यान्सर देखिएको पारिवारिक श्रोतले जनाएको छ । बालिकाको उपचारका क्रममा भरतपुर स्थित कलेज अफ मेडिकल साइन्सेस (पुरानो मेडिकल कलेज) चितवन मेडिकल कलेज, बिपि कोइराला मेमोरियल क्यान्सर अस्पताल हुँदै लामो समय भारत स्थित दिल्लिमा रहेको राजिव गान्धी क्यान्सर अस्पताल उपचार भएको थियो ।
भारतमा उपचारका क्रममा लाखौ रुपैया खर्च भएपछि परिवारको आम्दानीको कुनै श्रोत नभएकाले खर्च धान्न नसक्ने अबस्थामा पुगेपछी पुन बिरामी बालिका लाई भरतपुर स्थित बिपि कोइराला क्यान्सर अस्पतालमा ल्याइ थप उपचार गराइ रहेको बिरामी बालिकाका बुवा दिलिप अधिकारीले बताउनु भयो । छोरीको उपचारमा हाल सम्म करिव ४० लाख रुपैयाँ खर्च भइ सकेको र थप दुई बर्ष उपचारका लागि त्यति नै रकम लाग्ने भएपछी आफू समस्यामा परेको हुँदा सहयोगका लागि अनुरोध गर्नु बाहेक कुनै बिकल्प नभएको बताउनु भयो ।
