चितवन/चितवनमा अत्यधिक गर्मी बढेसंगै अस्पतालहरुमा बिरामीको चाप दिनप्रतिदिन बढ्दै गइरहेको छ । दिनमा हजारौं भन्दा बढीको संख्यामा ओपिडीमा टिकट काट्नेको संख्या बढेको अस्पताल स्रोतले जनाएको छ । केहीदिन अगाडिबाट बिमाको अनलाइन सिस्टमबाट टिकट काट्ने व्यवस्था रद्द भएपछि हजारौंको संख्यामा ओपिडीमा टिकट  काट्नेको संख्या ह्वात्तै बढेको हो । ज्वोरो, निमोनिया, पेट दुख्ने, झाडापखाला र अन्य रोगीका बिरामीहरु विभिन्न समस्या लिएर अस्पताल आउने गरेको भरतपुर अस्पतालमा कार्यरत बालरोग विशेषज्ञ डा. रचना श्रेष्ठले जानकारी दिनुभयो ।

अस्पतालमा अत्यधिक बिरामीको भिडभाडका कारण बिरामीहरुलाई समयमा नै उपचार गराउन समेत समस्या भएको डा. श्रेष्ठको भनाइ छ । निकै टाढा र बाहिरी जिल्लाबाट आउने बिरामीहरु हप्तौंसम्म लगाएर उपचार लिइरहेका छन् । अस्पतालमा सिमित मात्रामा बेडहरु हुँदा भर्ना भएका बिरामीहरु डिस्चार्ज नभएसम्म नयाँ बिरामी भर्नालिन समेत समस्या भएको डा. श्रेष्ठले जानकारी दिनुभयो । सामान्य पेट दुख्ने समस्या भएर अस्पतालको ओपिडी कक्षमा टिकट काट्दै गर्नुभएकी माडी निवासी शारदा पौडेलले दुईदिनसम्मपनि अझै पालो नपाएको गुनासो गर्नुभयो ।अत्याधुनिक एक्स रे, इन्डोस्कोपी तथा कोलोनोस्कोपी लगायतका सेवाहरुमा समेत बिरामीको चाप बढ्दा घण्टाैंसम्म लाइन बसेर उपचार गर्नुपर्ने बाध्यता बिरामीहरुमा छ ।