दूधपोखरी गाउँपालिका लमजुङका अध्यक्ष एव कार्यक्रमका प्रमुख अतिथी धनप्रसाद गुरुङले छैठौं साधारण सभा तथा तेस्रो अधिवेशनको उद्घाटन गर्दै गाउँपालिकाका बौद्धिक युवाहरु शहरतिर पलायन हुँदा खेतबारी बाँझिएको भन्दै चिन्ता व्यक्त गरे । देशको अस्थिर राजनीतिको मारमा गाउँपालिका पनि पर्ने गरेको भन्दै उनले चिन्ता व्यक्त गरे । उनले भने, ‘ सडक स्तरोन्नति र पर्यटन क्षेत्रलाई मुख्य प्राथमिकतामा राखेका छौं । गोरखाको अजिरकोट, सुलिकोट गाउँपालिकासँग मिलेर दूधपोखरीले पर्यटकीय पदमार्ग निर्माणको लागि पहल भइरहेको छ ।’ उनले सम्पर्क समाजका पदाधिकारीहरुले विकासको बारेमा दिएका सल्लाह सुझावलाई सधै मनन गर्दै आएको बताए ।

त्यस्तै कार्यक्रममा दूधपोखरी गाउँपालिका वडा नम्बर ३ का वडा अध्यक्ष मिनबहादुर गुरुङ, वडा न २ का वडा अध्यक्ष अमर गुरुङ,सेन्ट्रल कलेजका सञ्चालक एव प्रिन्सिपल यज्ञविलास पौडेल, समाजका सल्लाहकारहरु देवीप्रसाद दवाडी र बाबुराम दवाडीलगायतले समाजलाई अझ चलायमान बनाउँदै विकासका काममा अगाडि बढाउनुपर्ने सुझाव दिए । समाजका निवर्तमान अध्यक्ष होमनाथ न्यौपानेको अध्यक्षतामा भएको कार्यक्रममा उपाध्यक्ष राधादेवी दवाडीले स्वागत मन्तव्य र कोषाध्यक्ष विष्णु न्यौपानेले आर्थिक प्रतिवेदन प्रस्तुत गरेका थिए । न्यौपानेले समाजले बिगतमा दूधपोखरी गाउँपालिकामा विभिन्न सामाजिक सेवाका कार्यक्रमहरु सञ्चालन गर्दै आएको भन्दै संस्थाको प्रगति प्रतिवेदन र भावी योजनाहरु प्रस्तुत गरेका थिए।