चितवन क्षेत्र नं. ३ का सांसद एवं पूर्वमन्त्री बिक्रम पाण्डेले स्वदेश तथा बिदेशमा रहनुभएका सबै नेपाली आमाबुवा दाजुभाइ तथा दिदिबहिनीहरुमा शुभकामना व्यक्त गर्नुभएको छ । आज बिहानै एक शुभकामना सन्देश जारी गर्दै पूर्वमन्त्री पाण्डेले आफ्ना सन्ततिप्रति आमाको प्रेमभाव गहिरो र स्नेहपूर्ण हुने हुँदा आमाको सम्मानस्वरुप सबैले भक्तिभाव गर्नुपर्ने बताउनुभयो ।
धेरै आमाबुवाहरु बृद्धआश्रममा रहेको स्मरण गर्दै पूर्वमन्त्री पाण्डेले सबै सन्ततिहरुलाई बाबुआमाको सेवा सत्कार र घरमा नै राख्ने बाताबरणको सिर्जना हुन सकोस् भन्ने शुभेच्छा समेत जाहेर गर्नुभयो । राप्रपाका केन्द्रिय वरिष्ठ उपाध्यक्ष समेत रहनुभएका पूर्वमन्त्री पाण्डेले आजको दिनले देशमा राजनीतिक स्थायित्व, सुशासन, समृद्धि अनि सबैमा एकता र सद्भाव कायम गराउन महत्त्वपूर्ण भूमिका खेल्ने बिश्वास समेत लिनुभएको छ ।
मातातीर्थ औंसीका दिन नेपालमा मातृ दिवस वा आमा दिवस मनाइन्छ । यो आमालाई सम्मान गर्ने र सम्झने दिन पनि हो । हिन्दू संस्कृतिअनुसार वैशाख कृष्णपक्ष औंसीका दिन आमाको मुख हेर्ने दिन वा मातातीर्थ औंसीका रूपमा चिनिन्छ । यो दिन जन्म दिने आमाको मुख हेरी गच्छेअनुसार मीठो–मसिनो ख्वाउने चलन छ । आमा नहुनेहरूले भने थानकोटस्थित गर्जुधारामाथि पहाडको फेदीमा रहेको मातातीर्थमा स्नान गरी तर्पण दिने गर्दछ्न् ।
