चितवन/चितवनमा २२ हजार हेक्टर जग्गामा हुँदै आएको बर्षे धान खेती मध्ये ५ हजार २ सय हेक्टर जग्गामा अहिले चैते धान खेती गरिएको छ । बर्षे धानमा भन्दा चैते धान खेतीमा रोगका किराहरु कम लाग्ने हुँदा ओसिलो, सिंचाइ र मल राम्रो भएको जग्गामा चैते धान राम्रोसँग फस्टाउने प्रधानमन्त्री कृषि आधुनिकीकरण परियोजनाका कृषि अधिकृत इन्द्र शर्मा ढुंगानाले बताउनुभयो ।
“चैते धानमा अहिलेपनि खैरा डिजिज भन्ने रोग देखा परिरहेको छ, जसका कारण गवारो लाग्ने पात डढ्ने सुक्ने जस्ता समस्या थप चुनौतीपूर्ण बनेको छ” उहाँले भन्नुभयो, “यस बारेमा हामीले अनुगमन गरेर बालिरोग विशेषज्ञ र प्राबिधिकसंग परामर्श लिएर रोग निदानको प्रक्रिया अगाडि बढाउँछौं ।” चितवन चैते धान खेतीका लागि मात्र नभई अन्य खाद्य बाली र दलहन तथा तेलहन बालीका रूपमा समेत प्रख्यात छ ।
उर्वर कृषि भूमिको खण्डिकरणलाई रोकेर खेतीयोग्य जमिनको प्रबर्द्धन गर्न सकिएमा खाद्य क्षेत्रमा सबल उत्पादन भइ आत्मनिर्भर बन्न सकिने कृषि अधिकृत ढुंगानाको भनाइ रहेको छ । उहाँका अनुसार, यस बर्ष माडी नगरपालिकामा १ हजार ५ सय हेक्टर जग्गामा चैते धान खेती गरिएको छ । यसैगरी खैरहनी नगरपालिकामा १ हजार ८ सय ७८ हेक्टर जग्गामा धान खेती गरिएको छ । यसैगरी कालिका नगरपालिकामा १५ हेक्टर जग्गा र भरतपुर महानगरपालिकामा १०० हेक्टर भन्दा बढी जग्गामा चैते धान खेती गरिएको कृषि अधिकृत ढुंगानाले जानकारी दिनुभयो ।
