भरतपुर/बागमती प्रदेश उद्योग परिसंघ, महिला समितिको आयोजनामा ११४ औ अन्तराष्ट्रिय नारी दिवसको अवसरमा “उद्यमशिलता, महिलाका लागि चुनौती र अवसर” बिषयक अन्तरक्रिया कार्यक्रम सम्पन्न भएको छ ।
बागमती प्रदेश उद्योग परिसंघ, महिला समितिकी अध्यक्ष चन्दना कोइरालाको अध्यक्षतामा सम्पन्न कार्यक्रममा पूर्व मन्त्री माननीय उमा रेग्मी प्रमुख अतिथि रहनुभएको थियो ।
प्रमुख अतिथि माननीय रेग्मीले सरकारले महिला उद्यमीहरुबाट सञ्चालन गरेका उद्योगहरुलाई प्राथमिकतामा राखी सहज रुपमा सञ्चालन गर्ने वातावरण सिर्जना गर्नुपर्ने बताउनुभयो ।
कार्यक्रममा बागमती प्रदेश सभा सदस्य माननीय माया श्रेष्ठ, माननीय गीता गुरुङ्ग, अधिवक्ता कल्पना उप्रेती, बागमती प्रदेश उद्योग परिसंघका बरिष्ठ उपाध्यक्ष त्रिलोचन कँडेल, उद्योग तथा वाणिज्य कार्यालयका नारायण प्रसाद खनाल, उद्योग वाणिज्य संघ चितवनकी अस्मिता रिजाल, चितवन उद्योग संघ, महिला उद्यमी मञ्चकी अध्यक्ष सृजना सोती, फर्निचर उद्योग तथा फर्निसिङ्ग व्यवसायी संघ चितवनकी उपाध्यक्ष बिरन्जना घिमिरे, महिला उद्यमीहरु निर्मला पण्डित, कल्पना पौडेल खड्का लगायतका वक्ताहरुले महिला उद्यमीहरुले सञ्चालन गरेका उद्यमशिलतामा पर्ने समस्या र तिनका समाधानका विषयमा आफ्ना भनाईहरु राखेका थिए ।
अन्तरक्रिया कार्यक्रममा सहभागी महिलाहरुले कार्यक्रमका प्रमुख अतिथि, विशिष्ट अतिथिहरुलाई महिला उद्यमीहरुले उद्यमशिलताका झेल्नु परेका समस्याहरुका बारेमा प्रश्नहरु गरेका थिए । छलफलमा आएको समस्याहरुलाई सम्बन्धित निकायहरुसँग पु¥याई समाधान गर्न पहल गरिने समेत बताईएको थियो ।
कार्यक्रममा बागमती प्रदेश उद्योग परिसंघ महिला समितीका सदस्यहरु, चितवन उद्योग संघ महिला उद्यमी मञ्चका पदाधिकारी एवम् सदस्यहरु, उद्योग वाणिज्य संघ चितवनका महिला सदस्यहरु, मकवानपुर उद्योग वाणिज्य संघ लगायतका एकसय २० भन्दा बढी महिला उद्योगी, व्यवसायीहरुको सहभागिता रहेको थियो ।