काठमाडौँ/कवि शान्ता भट्ट (देवकोटा) को कवितासङ्ग्रह ‘उन्मुक्त मन’ को लोकार्पण गरिएको छ । प्रकाशक प्राज्ञिक बुक्सद्वारा काठमाडौँको बागबजारमा आयोजित एक कार्यक्रमकाबीच सो कृतिको लोकार्पण गरिएको हो।सङ्ग्रहलाई नेपाल प्रज्ञा–प्रतिष्ठानका प्राज्ञ डा.मधुसुदन गिरी, प्राज्ञ डा. कौशिला रिसाल, कार्यक्रमका सभाध्यक्ष बद्रिप्रसाद ढकाल, समीक्षकहरु उपप्राध्यापक राजिन पनेरु र उपप्राध्यापक अनुपमा रेग्मी लगायतले सो कृतिको सामुहिक लोकार्पण गर्नुभएको हो ।
कृतिको बारेमा समीक्षा गर्दै अनुपमा रेग्मीले कवि शान्ताको सिर्जन शक्ति राम्रो भएको भन्दै उज्जल भविष्यको कामना गर्नुभयो ।
समीक्षक राजिन पनेरुले आयामको दृष्टिबाट कृति उन्मुक्त रहेको बताउनु भयो । वादको आँखाले हेर्यो भने रचनाहरु नमिल्न सक्ने बताउँदै उहाँले उन्मुक्त र घोषित संरचनामा नबाँधिएको बताउनु भयो । भाषिक कसरमसर केही सुधार गर्नुपर्ने आवश्यकता रहेको उहाँले बताउनु भयो ।
प्राज्ञ डा. कौशिला रिसालले कृतिकारलाई हौसला प्रदान गर्नुभयो । लेखन सुरु गर्दा सिद्धान्त र संरचनामा कसैले पनि ध्यान नदिने उल्लेख गर्दै सैद्धान्तिक कुरामा विस्तारै ध्यान दिँदै जानुपर्ने उहाँले बताउनु भयो ।
प्रमुख अतिथि प्राज्ञ डा. मधुसुदन गिरीले कृति लेखिसकेपछि लेखक मर्यो भन्ने चलन भए पनि आफू जन्मिएको भन्न रुचाउने बताउनु भयो । कवि भट्ट पनि जन्मिएको उहाँले बताउनु भयो । रचना गर्दै गएपछि शक्तिशाली र सवल बन्ने भन्दै उहाँले कृतिकार भट्टलाई निरन्तरता दिन आग्रह गर्नुभयो ।
कार्यक्रम समापन गर्दै प्रकाशक तथा सभाध्यक्ष बद्रिप्रसाद ढकालले कृतिमा समेटिएका रचनाहरु शीर्षक अनुसारकै उन्मुक्त रहेको उल्लेख गर्नुभयो । रचनाहरु पाठकसमक्ष प्रस्तुत गर्न पनि आँट चाहिने भन्दै कवि भट्टले त्यो आँट गरेको उहाँले बताउनु भयो ।
गोर्खाको बगुवामा जन्मिएकी कवि भट्ट (देवकोटा) ले आफू भर्खर जन्मिएको र पाठक, समीक्षक र शुभचिन्तकको साथ, सहयोग र हौसलाले विस्तारै हिड्न सक्ने बताउनु भयो । जीवन भोगाइका क्रममा प्राप्त विचार र भावनालाई रचनामा समेटेको पनि उहाँले बताउनु भयो ।
कृतिमा १७२ वटा मुक्तक र ४२ वटा कविता समेटिएका छन् ।
