चितवन/ खैरहनीमा अटिजम सम्बन्धी सचेतनामुलक तालिम सम्पन्न भएको छ । चितवन उद्योग संघ खैरहनी समिति , महिला उद्यमी मञ्चको आयोजनामा भएको दुईदिने तालिमको आज समापन भएको छ । खैरहनी नगरपालिकाको सहयोगमा संचालन भएको तालिममा प्रमिला न्यौपानेले प्रशिक्षण दिएकी थिइन् ।
अटिजमको समस्या भएकाहरुको अभिभावक र शिक्षिकाहरुलाई तालिम दिइएको हो । खैरहनी नगरपालिकाका नगर प्रमुख शशि कुमार खनियाँ , खैरहनी नगरपालिकाकी महिला तथा वालबालिका शाखाकी प्रमुख कृष्ण गुरुङ्ग ,उद्योग संघ खैरहनी समितिका अध्यक्ष युवराज पाठक, महिला उद्यमी मञ्चकी अध्यक्ष जिनिता बस्नेत लगायतले ‘तालिममा सहभागीहरुलाई प्रमाणपत्र वितरण गरेका थिए ।
समापन कार्यक्रममा बोल्दै तालिममा सहभागी गोपिनी हमा , सुमिना के.सी , मन्दिरा धरेल लगायतले तालिम निकै उपलब्धीमुलक रहेको बताए । अटिजमलाई रोगको रुपमा लिने गरेता पनि यो रोग नभएर एउटा समस्या रहेको भएको भन्दै त्यसको विस्तारै न्यूनिकरण गर्न सकिने कुरा बुझन पाएको प्रतिक्रिया दिए । अटिजम भएका व्यक्ति भनेर वेवास्ता गर्नुको साटो राम्रो व्यवहार गरेर उनीहरुको कुरा बुझ्न सके उनीहरुलाई समेत अन्य व्यक्ति रहन अगाडी बढाउन सकिने सहभागीहरुले बताए । यसअघि मन्टेश्वरीमा अटिजम भएका वालबालिकालाई पढाउन र भर्ना लिन समेत अफ्ठारो लाग्ने भएको भन्दै तालिमको माध्यमबाट धेरै कुरा सिक्न पाएकोले अब सहज रुपमा उनीहरुको हेरचाह गर्न सक्ने बताए ।
कार्यक्रममा बोल्दै खैरहनी नगरपालिकाका प्रमुख प्रशासकिय अधिकृत विष्णुप्रसाद सापकोटाले सिकेको कुरालाई आफूमा मात्रै सिमित गर्न नहुने आफूले सिकेका कुरालाई अरुलाई समेत सिकाउनुपर्नेमा जोड दिए । उनले सबै बालवालिकाहरुलाई शिक्षाको प्रकाशबाट बन्चित गर्न नहुने बताए । खैरहनी नगरपालिकाका नगर प्रमुख शशि कुमार खनियाँले नगरपालिकाले शिक्षा , स्वास्थ्यको विषयमा सबैसँग सहकार्य गर्न तयार रहेको बताए ।
