माडी/माडी क्षेत्रका उद्योगहरुबाट उत्पादित वस्तु तथा सेवाहरुको प्रबद्र्धन गर्ने उद्देश्य अनुरुप माडी नगरपालिकाको स्वामित्वमा बाँदरमुढे–६, माडीमा रहेको जग्गामा नेपाल घरेलु तथा साना उद्योग कार्यालय चितवनको आर्थिक सहयोगमा निर्माण भएको ५ कोठे भवनको दुई कोठाहरुमा कोशेली घर सञ्चालनको लागि चितवन उद्योग संघ, माडी समितिलाई एक कार्यक्रमका बीच हस्तान्तरण गरिएको छ ।
चितवन उद्योग संघका अध्यक्ष सूर्य प्रसाद न्यौपानेको अध्यक्षतामा सम्पन्न कार्यक्रममा माडी नगरपालिकाकी प्रमुख तारा कुमारी काजी महतो प्रमुख अतिथि रहनुभएको थियो । प्रमुख अतिथि महतोले कोशेली घरबाट माडी क्षेत्रका उद्यमीहरुबाट उत्पादिन वस्तु तथा सेवाहरुको प्रबद्र्धन हुनेमा विश्वास व्यक्त गर्नुभयो । उहाँले माडी क्षेत्रका उद्यमीहरुको मागलाई उच्च प्राथमिकताका साथ कोशेली घरबाट सेवा प्राप्त गर्नेमा आफू विश्वस्त भएको बताउनुभयो ।
चितवन उद्योग संघका अध्यक्ष सूर्य प्रसाद न्यौपानेले स्वागतसँगै कार्यक्रमको उद्देश्य माथि प्रकाश पार्नुभएको कार्यक्रममा आयोजक संस्था नेपाल घरेलु तथा साना उद्योग कार्यालय चितवनका प्रमुख धिरेन्द्र प्रसाद पोखरेलले कार्यक्रमको सफलताको शुभकामना व्यक्त गर्नुभएको थियो । प्रमुख अतिथि माडी नगरपालिकाकी प्रमुख तारा कुमारी काजी महतोले रिबन काटेर कोशेली घरको उद्घाटन गर्नुभएको थियो । भने, चितवन उद्योग संघ, माडी समितिका अध्यक्ष रमेश नेपालीले कार्यक्रमका प्रमुख अतिथि महतोलाई सम्झौता पत्र हस्तान्तरण गर्नुभएको थियो ।
यसैबीच कंक्रिट उद्योगको उत्पादनको गुणस्तर अभिवृद्धिसँग सम्बन्धित आरएमवान तालिमको समेत समुद्घाटन गरिएको छ । तालिम कार्यक्रमको माडी नगरपालिकाकी प्रमुख तारा कुमारी काजी महतोले गमलामा पानी हालेर उद्घाटन गर्नुभएको थियो ।
त्यस्तै सोही अवसरमा माडीका उद्यमीहरुलाई समेटेर नेतृत्व विकास सम्बन्धि तालिमको समेत आयोजना गरिएको थियो ।
