चितवन/होटल व्यवसायी संघ चितवनको आयोजनामा पुस १८ गतेसम्म नारायणगढस्थित क्याम्पाचौरमा पुस १४ गतेदेखि रैथाने फुड फेस्टिबल हुँदै छ । पाँच दिनसम्म चल्ने फुड फेस्टिबलमा परम्परागत खानाका परिकार पाइने ३९ वटा स्टल रहने फेस्टिबलमा थारु खाना, नेवारी खाना, शुद्ध नेपाली खाना, थकाली खाना, शाकाहारी भोजनालय, चितवनको तास, स्पेशल लोकल कुखुराको सेकुवा, लोकल हाँस तथा माछाको परिकारलाई मुख्य रैथाने परिकारको रुपमा स्टल राखिने होटल व्यवसायी संघका अध्यक्ष लोकनाथ भट्ट (कृष्ण)ले बताए ।
फेस्टिबलको मुख्य आर्कषणको रुपमा राष्ट्रिय तथा स्थानीय कलाकारहरुको विशेष प्रस्तुती रहने आयोजकले जनाएको छ । पुस १४ गते पशुपति शर्मा, प्रिति आले, सागर लम्साल(बले), १५ गते स्वप्न सुमन, १६ गते द स्याडोजको प्रस्तुती रहनेछ । त्यस्तै, १७ गते सुवोध गौतम(एकदुमे), तारा थापा, प्रजापति पराजुली र १८ गते अनु चौधरी, कर्णराज गिरी, ढाकाराम पौडेल, भुवन प्यासी, बाल कलाकार सुप्रिम मल्ल लगायत आउने उनले बताए ।
फेस्टिवल अवधिभर ५० हजार जनाले अवलोकन गर्ने आयोजकको अनुमान छ । पाँच दिनमा करिब पाँच करोड भन्दा माथीको कारोबार हुने अनुमान गरिएकोे होटल व्यवसायी संघका अध्यक्ष भट्टले जानकारी दिए । फुड फेस्टिबल परिसरभित्रै खानेपानी तथा शौचालयको उचित प्रबन्ध गरिनुको साथै फ्रि वाइफाई र निःशुल्क पार्किङको समेत व्यवस्था गरिएको आयोजकले जनाएको छ । फुड फेस्टिबल बेलुका ४ बजेदेखि राति १० बजेसम्म सञ्चालन हुनेछ । नयाँ वर्ष र ल्होसारको अवसरमा पुस १५ र १६ गतेको लागि प्रवेश शुल्क ३०० रुपैयाँ तोकिएको छ भने अन्य दिन निःशुल्क प्रवेश गर्न पाइने उनले जानकारी दिए । पुस १५ र १६ गते राति १२ बजेसम्म स्टलहरु खुल्ला रहनेछन् ।
