भरतपुर/चितवनको सबैभन्दा पुरानो र सम्भवत् नेपालकै ठूलो अत्याधुनिक सुविधा सम्पन्न चितवन जिम हाउसको आयोजनामा प्रथम सिपिएफसि÷चितवन जिम हाउस पावर लिप्टिङ्ग मिट–२०८० तथा शुभकामना आदान प्रदान कार्यक्रम सम्पन्न भएको छ ।
चितवन जिम हाउसका प्रबन्ध निर्देशक प्रकाश गुरुङको अध्यक्षतामा सम्पन्न कार्यक्रममा बागमती प्रदेश सरकारका स्वास्थ्यमन्त्री माननीय उत्तम जोशी प्रमुख अतिथि रहनुभएको थियो । प्रमुख अतिथि जोशीले खेलप्रेमीहरुको चाहनालाई मध्यनजर गर्दै स्वस्थ जीवनको लागि चितवन जिम हाउसले आयोजना गरेको पावर लिप्टिङ कार्यक्रम अहिलेको अवस्थामा निकै सान्र्दभिक रहेको बताउनुभयो । खेलले युवायुवतीहरुको स्वास्थ्यसँगै एकताको भावना जागृत हुने विश्वास समेत व्यक्त गर्नुभयो ।
चितवन जिम हाउसका प्रमुख सल्लाहकार एवम् नेपाल बडीबिल्डिङ फिटनेश फ्रेडेरेशनका केन्द्रीय सदस्य राकेशमान श्रेष्ठले स्वागतसँगै कार्यक्रमको उद्देश्यमा माथि प्रकाश पार्नुभएको थियो ।
चितवन जिम हाउसका प्रेस सल्लाहकार राजु भट्टले सञ्चालन गर्नुभएको कार्यक्रममा चितवन जिम हाउसका जन्मदाता एवम् संरक्षक सन बहादुर गुरुङ, परिवेश टोल विकास संस्थाका उपाध्यक्ष प्रभु रानाभाट, चितवन जिल्ला पावर लिप्टिङका जिल्ला अध्यक्ष एवम् पावर हाउस जिमका प्रबन्ध निर्देशक आनन्द गुरुङ, चितवन जिम हाउसका सल्लाहकारहरु वसन्त राना, सूर्य हल्क, राजेन्द्र गुरुङ, प्रविन सिंह लगायत जिमप्रेमीहरुको सहभागिता रहेको थियो ।
कार्यक्रम अन्तर्गत चितवन जिम हाउस (सिपिएफसि) अन्तर्गत क्षेत्रपुर, भरतपुर, रिजालचोक र गैंडाकोट नवलपुरमा सञ्चालनमा रहेका तीनवटा शाखामा आवद्ध जिमप्रेमीहरुबीच भएको पावर लिप्टिङ प्रतियोगितामा ३ महिला सहित १९ जनाको सहभागिता रहेको थियो ।
प्रतियोगितामा महिलातर्फ ६० के.जि.भन्दा कम तौलमा शर्मिला तामाङ प्रथम र ६० के.जि.भन्दा माथिको प्रतिस्पर्धामा जुलु गुरुङ प्रथम र विपना अधिकारी द्धितीय भएका छन् ।
त्यस्तै पुरुष तर्फ ६६ के.जि.भन्दा कम तौलको प्रतिस्पर्धामा सुमन भुजेल प्रथम, उत्सव रिजाल द्धितीय र ईश्वर लोहनी तृतीय भएका छन् । त्यस्तै ६७ देखि ७७ के.जी.को प्रतिस्पर्धामा निखिल तामाङ प्रथम, नवाज आलम द्धितीय र प्रयास उप्रेती तृतीय भएका छन् । त्यस्तै पुरुषतर्फकै ७७ के.जि.भन्दा माथिको प्रतिस्पर्धामा विक्रम पौडेल प्रथम, सुभाष अधिकारी द्धितीय र रोहित गुरुङ तृतीय भएका छन् ।
प्रतियोगितामा प्रथम हुनेलाई ६ महिनासम्मको मासिक शुल्कमा छुट, द्धितीय हुनेलाई ४ महिना सम्मको छुट र तृतीय हुनेलाई २ महिनासम्मको छुट दिइने चितवन जिम हाउसका प्रबन्धक नविन रानाले जानकारी दिनुभयो ।
चितवन जिम हाउसका प्रमुख प्रशिक्षण सुरेश राजवंशीको संयोजकत्वमा सम्पन्न पावर लिप्टिङ कार्यक्रममा बोध खड्का प्रमुख निर्णायक र राजेश श्रेष्ठ, सुजन गुरुङ, आकाश गुरुङ, निश्चल गुरुङ, हाना भण्डारी, मिरा बम्जन, आकृत विक्रम बरुवाल, सुधिर श्रेष्ठ, दिनेश कँडेल, विधान श्रेष्ठ र सुवोध वि.क. निर्णायकको भूमिकामा रहनुभएको थियो ।