भरतपुर/ भरतपुर–११, जागृतिचोकस्थित हिमालय आधारभूत विद्यालय (१–८) मा सरस्वतीको मूर्ति स्थापना गरिएको छ। विद्यालय व्यवस्थापन समितिका अध्यक्ष अधिवक्ता जगन्नाथ भण्डारीले आफ्ना पिता स्व.कुलप्रसाद भण्डारीको पुण्यस्मृतिमा मूर्ति निर्माण गरिदिएका हुन्। बुधबार भरतपुर महानगरपालिका वडा नं.११ का अध्यक्ष कमलबहादुर मल्लको प्रमुख आतिथ्यतामा भण्डारीकी आमा डिलकुमारी भण्डारी, श्रीमती शिवकुमारी पाण्डे भण्डारीलगायत स–परिवारको उपस्थितिमा उक्त मूर्तिमा प्राणप्रतिष्ठा गरी उद्घाटन गरिएको हो। संविधान दिवसको अवसर पारेर विद्यालयमा सरस्वतीको मूर्ति स्थापना गरिएको हो।

सोही अवसरमा एक जना छात्रालाई साइकल र चार जना विद्यार्थीलाई पोषाकसमेत वितरण गरिएको छ। कक्षा ६ मा अध्ययनरत रोशनी थामीलाई एसियन पेन्ट्सका विक्रेता कृष्ण घिमिरेले साइकल प्रदान गरेका हुन्। यस्तै कक्षा १ मा अध्ययनरत मुना चेपाङ र अशोक कुमाल, कक्षा २ मा अध्ययनरत युसन कुमाल र कक्षा ३ मा अध्ययनरत सोनिशा परियारलाई निलगिरि जागृति टोल विकास संस्थाको तर्फबाट पोषाक प्रदान गरिएको छ। उनीहरूलाई संस्थाका अध्यक्ष रामकृष्ण श्रेष्ठले पोषाक प्रदान गरेका थिए। साथै विद्यालयमा आवश्यक पर्ने खेलकुदका सामग्रीसमेत प्रदान गरेका थिए।

विद्यालयमा भौतिक संरचनाको विकास बढ्दै गए पनि गुणस्तरीय शिक्षाको लागि आवश्यक सामग्रीको व्यवस्था मिलाउन विद्यार्थीहरूले शिक्षक, अभिभावक तथा विद्यालय व्यवस्थापन समितिका पदाधिकारीहरूलाई झक्झक्याएका छन्। सम्पूर्ण विद्यार्थीहरूका तर्फबाट आफ्ना भनाइ राख्दै कक्षा ८ मा अध्ययनरत चन्दनकुमार यादवले विद्यालयमा अझै पनि पर्याप्त मात्रामा शौचालयको व्यवस्था नभएको बताए । त्यसबाहेक विज्ञान प्रयोगशाला तथा कम्प्युटरलगायतका प्राविधिक शिक्षामा आवश्यक सामग्रीको अभाव भइरहेको उनले बताए। ‘वर्तमान अवस्थामा प्राविकधिक तथा व्यवहारिक ज्ञान आर्जनको अभ्यास सबै विद्यालयमा बढ्दै गएको छ,’ उनले भने, ‘हाम्रो विद्यालयमा पनि साइन्स ल्याब र कम्प्युटर कक्षाको लागि पर्याप्त मात्रामा कम्प्युटर राख्न सकेको भए हामीलाई धेरै सहज हुने थियो।’ कार्यक्रममा भरतपुर–११ का वडाअध्यक्ष मल्ललगायत छिमेकी विद्यालयका विद्यालय व्यवस्थापन समिति, विद्यालयका विभिन्न विभागका प्रमुखलगायतले विद्यालय र शैक्षिक गतिविधिसहित संविधान दिवसको विषयमा बोलेका थिए।